Lyk van onbekende meisie in Cradock-skoolbus gevind
2012-07-24 23:00
Kaapstad – Nóg skokkende besonderhede het aan die lig gekom toe die uitkenning van lyke van die busongeluk naby Cradock begin het.
Die liggaam van 'n jong meisie, wat ongeveer sewe jaar oud was, is in die skoolbus van die Cradock laerskool gevind, maar onderwysers het volgehou dat sy nie 'n leerling by die skool was nie.
Dit het toe aan die lig gekom dat die meisie 'n passasier in die minibus-taxi was en dat sy waarskynlik uitgeslinger is en in die skoolbus geland het toe die twee voertuie gebots het.
Hilgard Matthews, die departement van vervoer se eksterne kommunikasie direkteur, het Dinsdag 'n beroep gedoen op families wat geliefdes vermis om die polisie in Cradock te skakel.
Volgens ooggetuies was die Mtwana Tours-minibus vanaf Kaapstad na Mthatha onderweg toe dit probeer het om 'n ander voertuig verby te steek en teen die aankomende 60-sitplek skoolbus gebots het.
Minstens 17 mense is in die ongeluk dood.
Volgens die eienaar van Mtwana Tours, TP Mtwana, het die bestuurder sowat 'n uur voor die ongeluk by sy mede-bestuurder oorgeneem.
Hy het gesê die mede-bestuurder is in 'n kritieke toestand in die hospitaal.
"Ek wil graag namens Mtwana Tours jammer sê aan al die families en my medelye betoon. Ons veroordeel onverantwoordelike bestuurders te sterkste."
Die Cradock laerskool se adjunk-hoof, Alfie Blume, is besig om in die Greenacres-hospitaal aan te sterk.
Nog 'n onderwyser, Jacques de Meillon, het Dinsdag 'n operasie in Bloemfontein ondergaan. Sy vrou, Ursula, het gesê hy is stabiel.
Die skoolhoof Wimpie van der Merwe en die 10-jarige Stephanus Cornelius Ferreira het op die toneel beswyk.
Volg Nuus24 op Twitter.
- SAPA
