Lyk met swaard in die bors in huis gekry
2012-02-04 10:13
Johannesburg – Die polisie het Vrydag in Johannesburg op die lyk van ’n man afgekom wat op die vloer van ’n huis met ’n swaard in sy bors gelê het.
Sers. Jenny Pillay, polisiewoordvoerder, het Vrydag aan Beeld gesê die veiligheidsmaatskappy ADT het die polisie gisteroggend omstreeks 06:50 na ’n huis in Craighall ontbied omdat mense daar oor rusverstoring gekla het.
“Die polisie is daarheen en het die lyk van ’n 52-jarige man op die sitkamervloer gekry.”
’n Swaard het by sy bors uitgesteek.
Die man en sy vrou was alleen in die huis.
Pillay het gesê die vrou is hospitaal toe geneem omdat sy erg getraumatiseerd was. Sy kon nog nie ’n verklaring aflê nie.
“Die lykskouing sal bepaal wat die omstandighede van die man se dood is,” het hy gesê.
– Volg Nuus24 op Twitter
- Beeld