Lyk dalk dié van vermiste baba
2010-02-25 07:36
Kobus Pretorius
Kaapstad - Die lyk van ’n baba wat Woensdagoggend op ’n plaas in Philippi gevind is, is dalk dié van Mina Jarvis wat verlede jaar vermis geraak het.
Die erg ontbinde lyk is omstreeks 08:00 deur ’n plaaswerker in ’n oop stuk veld tussen ’n klomp rommel op die Vredendal-plaas aan Weltevredenweg, Philippi, gevind.
Die Burger het in Desember oor Mina (toe 18 maande oud) berig wat glo deur haar ma, Willemina Jarvis, in ’n puttoilet gegooi is.
Jarvis het destyds aan die polisie gesê sy het haar dogter in die puttoilet gegooi. Sy kon egter nie onthou wanneer sy dit gedoen het nie.
Sy is van moord aangekla, maar die saak is teruggetrek omdat daar geen bewyse was dat Jarvis haar kind vermoor het nie.
Met Die Burger se aankoms op die toneel was omstanders en familielede oortuig dat die lyk dié van Mina is.
Mina se tante, wat nie haar naam wou noem nie, het aan omstanders gesê sy herken die klere aan die lyk.
Insp. Ian Williams, ’n polisiewoordvoerder, kon nie bevestig of dit wel Mina se lyk is nie en het gesê die identiteit van die baba is nog onbekend.
“’n Nadoodse ondersoek sal eers gedoen moet word om die identiteit te bepaal.”
Williams het gesê ’n geregtelike ondersoek is geopen.
Die lyk van ’n fetus is Woensdag omstreeks 08:00 in Thambo Square, Guguletu, gevind.
Volgens kapt. Frederick van Wyk, provinsiale polisiewoordvoerder, het ’n hond na bewering aan die fetus gevreet.
“Die geslag en ouderdom van die fetus kon nog nie vasgestel word nie. Navrae by die Guguletu-daghospitaal het niks opgelewer nie. Niemand het deur die nag met enige maagprobleme daar aangemeld nie.”
Van Wyk het gesê niemand in Guguletu kon enige inligting verskaf oor vroue in die gebied wie se fetus dit kan wees nie.
“’n Dossier oor die verberging van ’n geboorte is geopen en die saak word ondersoek.”
Enigiemand met inligting oor die Philippi-saak kan die ondersoekbeampte, insp. Tommy Prinsloo, by 0 021 690 1500 of 0 084 657 0152 bel.
Enigiemand met inligting oor die Guguletu-saak kan die ondersoekbeampte, insp. Michael Festus, by 021 684 1500 of 078 632 0898 bel.
- Die Burger