Lyk by huis afgelewer
2009-10-26 05:53
Port Elizabeth. – ’n Desperate begrafnisondernemer wat nie meer geweet het wat om met ’n onopgeëiste lyk te doen nie, het dié lyk netjies gekis en gepoeier by die huis gaan aflaai.
Wendy Steenkamp (42) se lyk het meer as drie maande in die yskaste by Ruiters-begrafnisondernemers op Hankey gelê sonder enige pogings om haar begrawe te kry.
Saterdagmiddag het Henna Ruiters, die ondernemer se vrou, toe beveel dat Steenkamp se lyk afgelewer moet word op die plaas waar sy vroeër jare gewerk het.
“Ons was desperaat, want die lyk het al ’n reuk begin afgee wat ons ander kliënte kon ontstig.
“Toe gee ek uit my eie sak ’n kis en ek stuur die lykwa plaas toe. Dis jammer, maar dit kon nie anders nie,” het Ruiters gesê.
Dié onwelkome aflewering het groot konsternasie op die sitrusplaas veroorsaak.
Netta Prins, in wie se ouerhuis die oorledene vroeër tuisgegaan het, het gesê: “’n Lyk verdien tog om met eerbied en respek behandel te word. Wat hier gebeur het, is onmenslik. Wat van die stomme kinders wat dit moes aanskou? Om nie van die kieme te praat nie!”
Volgens Prins het Steenkamp as lemoenplukker op die plaas gewerk, maar is sy in 2007 daar weg. Verlede jaar het sy kontrakwerk op ’n buurplaas gekry en het Prins se pa, John Blaauw, blyplek aan haar gegee.
“Sy was lief en dierbaar, maar sonder enige familie. Ons het haar uit die goedheid van ons hart onderdak gegee.”
Nadat die lyk egter afgelewer is, het hulle op die plaas begin graf grou en haar ter ruste gelê.
- Beeld