Luukse spa brand af
2009-12-11 09:42
Malani Venter
Kuilsrivier - ’n Swart gebrande murasie en die reuk van aroma-olies was die enigste tekens van die eens luukse Mangwanani-spagebou wat gistermiddag op die Zevenwacht-landgoed afgebrand het.
’n Brand het omstreeks 16:00 in vermoedelik ’n leë stoorkamer van die gebou, wat op ’n koppie tussen wingerdlande sowat 3 km van die hekke van die landgoed geleë is, uitgebreek.
Niemand is in die voorval beseer nie.
Yolanda Swart, takbestuurder van die Mangwanani-dagspa, het op die toneel aan Die Burger gesê: “Genadiglik kon almal betyds uit die gebou gekom het.”
Ongeveer 80 mense was in die spa toe die brand uitgebreek het.
Dit is nog onbekend wat die oorsaak van die brand was.
“Ons het rook van die stoorkamer geruik en dadelik die brandweer ontbied. Sowat 30 kliënte en 50 personeellede het die gebou ontruim.
“Ons het met brandblussers en nat handdoeke probeer om die vuur te keer.
“Die kantoor is ook ontruim sover ons kon. Rekenaars, sakke met handdoeke en gasbottels is uitgedra.
“Ons is almal geskok. Hierdie was nie mooi om te aanskou nie,” het Swart gesê.
Volgens ’n woordvoerder van die Metro-brand-en-reddingsdienste het hulle omstreeks 16:26 ’n oproep ontvang oor ’n huis wat op die landgoed brand, berig Nurene Jassiem.
“Toe ons brandweerwaens daar aankom, het ons gevind dat ’n strooidakgebou aan die brand was.
“Die brand was ook besig om na die omliggende wingerde te versprei,” het die woordvoerder gesê.
Teen 20:00 was brandbestryders steeds besig om vlamme te blus en die toneel te monitor.
Nico van Heerden, wat die brand van sy woonhuis in die aangrensende Zevenwacht Country Estate dopgehou het, het gesê die brandweer was vinnig op die toneel en het vlamme na die nabygeleë renosterbosveld betyds geblus.
– Beeld