Lugmag 'se vlerke geknip'
2009-08-21 06:38
Erika Gibson
Pretoria - Die lugmag bly mank aan vlieg- en tegniese kundigheid.
Daar is tans 54% te min ingenieurs en 48% te min vegvlieëniers, terwyl die res van die vliegtuig-indelings beswaarlik beter daaraan toe is.
Planne is in die vooruitsig om binne die volgende jaar sowat R20 miljoen te bestee om nuwe kundiges aan te stel.
Dít blyk uit die antwoorde op ’n skriftelike parlementêre vraag van David Maynier, DA-woordvoerder oor verdediging, oor vaardigheidstekorte in die lugmag.
Van die 60 poste vir vegvlieëniers is 29 vakant. Die lugmag het nie aangedui hoeveel van die mense wat wel in poste is as operasionele vlieëniers dien nie. Die ongevulde poste is reeds gemiddeld 17 maande vakant, wat beteken daar is min vordering.
Verlede jaar was daar slegs 20 operasionele vegvlieëniers oor, wat beteken het daar is twee en ’n half nuwe vegvliegtuie vir elke vlieënier.
Die grootste tekort is dié aan ingenieurs, waar 70 uit die 130 poste vakant is. Luidens die antwoord het die lugmag nog altyd ’n tekort aan ingenieurs gehad – hoofsaaklik omdat die weermag nie met salarisse in die private sektor kan tred hou nie.
Sowat 34% van die helikopter-indeling se 167 poste is die afgelope 16 maande ongevul. In die maritieme vervoer-indeling is daar 30% te min vlieëniers en 47% te min navigators.
Die lugmag maak ook nie vordering om sy vakante poste vir lugruimbeheerders te vul nie. Sowat 37% van die 77 poste is reeds drie jaar lank vakant.
Volgens Maynier kom die tekorte daarop neer dat die lugmag se vlerke geknip is.
“Meer vliegtuie staan op die grond as wat daar vlieg – dít terwyl me. Lindiwe Sisulu (minister van verdediging en militêre veterane) aangedui het dat sy ‘persoonlik werklik tevrede is met die gereedheidstand’ van die weermag.”
Die lugmag het in die onlangse verlede verskeie vlieëniers en ander lugvaartkundiges verloor nadat die Australiese lugmag en kommersiële lugdienste aggressief onder sy personeel gewerf het.
- Die Burger