Lugmag red Turk van skip aan Weskus
2010-06-28 09:00
Die Burger
Kaapstad - Twee Oryx-helikopters en ’n Dakota T47TP van die lugmagbasis Ysterplaat buite Kaapstad het Saterdagoggend deinings van tot vier meter getrotseer om ’n beseerde matroos van die Turkse vragskip Proud te red.
Die dramatiese reddingspoging het hom sowat 150 seemyl van die Weskus afgespeel. Beamptes van die Nasionale Seereddingsinstituut (NSRI) was saam om Orhan Oz (23) van die skip af te haal.
Verpleegpersoneel by die Christiaan Barnard-gedenkhospitaal het Sondagmiddag gesê sy toestand is ernstig, maar stabiel. Oz was Sondag aan ’n asemhalingstoestel gekoppel wat suurstof verskaf.
Van sy ribbes is gebreek en sy een long is ernstig beseer.
Benewens die deinings moes die reddingspan ’n wind trotseer wat teen nagenoeg 25 knope (45 km/h) gewaai het.
Die vragskip is van Brasilië na Singapoer onderweg.
Maj. Joy Christie, woordvoerder van die lugmagbasis Ysterplaat, het gesê hulle is Saterdag teen 10:00 ingelig dat ’n bemanningslid op die vragskip ernstig seergekry het.
Die Turkse matroos het glo Vrydagoggend by ’n trap op die skip afgeval.
Ander bemanningslede het hom later die dag bewusteloos by die trap gevind en onmiddellik met ’n dokter op land in verbinding getree.
Die dokter het gesê hy moet so gou moontlik by ’n hospitaal uitkom.
Christie het gesê lugbemanning van 35 Eskader en 22 Eskader is onmiddellik opgekommandeer en die twee Oryx-helikopters en die Dakota is na die skip gestuur.
Die lede van die NSRI, asook ’n paramedikus, is saam om die beseerde matroos te ondersoek en te stabiliseer.
Lt.kol. Gerrie van der Merwe, bevelvoerder van 35 Eskader by Ysterplaat, en lt. Zack Smith, bevelvoerder van die Dakota, het gesê hulle het die basis om 11:30 verlaat.
“Ons taak was om die skip te soek en die presiese ligging vir die twee helikopters deur te gee,” het Van der Merwe gesê.
Van der Merwe het gesê alles het redelik vlot en vinnig verloop.
Met die terugkeer van die helikopters na Ysterplaat het paramedici van die ambulansdiens NetCare911 Oz gestabiliseer en vir behandeling na die hospitaal gebring.
- Die Burger