Louise se skoolmaats, gesin in rou gedompel
2011-10-15 08:16
Johannesburg – Die nuus van Louise de Waal se dood het vandag eers werklik ingesink.
Só het David Agsteribbe, Louise se swaer en woordvoerder van die De Waal-gesin, gister gesê en bygevoeg dit gaan nie goed met die familie nie.
“Dit lyk my die verskriklike nuus dat sy dood is, dring nou eers werklik deur.
“Weezy, soos ons haar genoem het, sou Sondag 17 geword het.
“Ons sou almal Sondag partytjie gehou het om haar verjaardag te vier.”
Sedert Louise se ontvoering en moord is haar skool, die Hoërskool Die Burger in Roodepoort, en gemeenskap in paniek en skok gedompel.
Net sowat die helfte van haar skoolmaats het sedert Donderdag by die skool opgedaag en beraders help die onderwysers en kinders voortdurend deur ’n uitsonderlike moeilike tyd, het Amina Raymond, voorsitter van die beheerliggaam, gesê.
“Dit is ’n ongelooflike moeilike situasie om te hanteer. Die kinders, veral die meisies, is verstaanbaar getraumatiseerd.
“Ons probeer ons bes om die kinders in die skool veilig te hou.
“Dit is egter nie ’n onveilige deel waarin die skool geleë is nie en omdat dit (die ontvoering) buite skoolure gebeur het, bemoeilik dit ook ons werk.”
Raymond het egter gesê die skool en beheerliggaam sal enigiets doen om die kinders veilig te hou.
Sekuriteit by die skoolhekke is opgeskerp en die skoolterrein word gepatrolleer.
Louise is Woensdagoggend 200m van haar huis in Rinastraat ontvoer toe sy saam met ’n 17-jarige vriendin die 700m na hul skool wou stap.
Haar verbrande lyk is dieselfde dag omstreeks 13:00 op ’n plaas naby Ma-ropeng gevind.
’n Roudiens word Woensdag om 13:30 by die skool gehou, het Raymond gesê.
Die reëlings vir Louise se begrafnis is nog onbekend.
– Volg Nuus24 op Twitter.
- Volksblad