Louise se ontvoerder na Gauteng geneem
2011-10-13 19:53
Johannesburg – ‘n Vermeende reeksverkragter wat erken het hy het die hoërskoolleerder Louise de Waal ontvoer en vermoor, is na Gauteng geneem, het die polisie Donderdag gesê.
“Hy het homself vanoggend by die Margate-polisiekantoor [in KwaZulu-Natal] oorgegee,” het maj. genl. Nobesuthu Masiya, waarnemende polisiekommissaris, Donderdag aan verslaggewers in Johannesburg gesê.
Volgens lt. kol. Tshisikhawe Ndou, polisiewoordvoerder, het die polisie in KwaZulu-Natal die man ondervra en is “sekere bekentenisse [deur hom] gemaak”.
Hy het gesê die polisie is nie seker of die bekentenisse mettertyd ‘n formele bekentenis sal wees nie.
“Daar is verskeie dinge wat gedoen moet word. Hy was aan die vlug, maar word op die oomblik na Gauteng vervoer,” het hy gesê.
“Wanneer hy arriveer, sal ons sien hoe dinge van daar af sal gaan.”
Volgens Masiya het ao. Peet du Toit, wat die ondersoek na die ontvoering van die 17-jarige De Waal gelei het, die man deur sy broer in die hande gekry en hom oortuig om homself oor te gee aan die polisie.
Die man word na bewering verbind met vyf sake van verkragting en een van moord, het sy gesê.
Die misdade het tot die man se bynaam, die “Sondag-verkragter”, gelei.
“Hy het nog nie skuld beken op die ander verkragtings en die moord nie,” het Masiya gesê.
Volgens Du Toit het die man se modus operandi gepas by dié van die “Sondag-verkragter”.
“Die man het gewoonlik op Sondae tussen 10:00 en 13:00 in sekere woonbuurte in Gauteng en Noordwes na meisies van tussen 10 en 17 jaar oud gaan soek,” het hy gesê.
“Hy sou dan 20 of 30 kilometer wegry en die meisies verkrag. Hy sou ook dikwels ‘n aandenking van hulle vat, soos ‘n kopband of ‘n broekie.”
Volgens Masiya is die man, in sy 30’s, voorheen aan seksuele aanranding skuldig bevind.
“Hy is in 2007 in hegtenis geneem, skuldig bevind en tot drie jaar gevangenisstraf gevonnis. Die vonnis is egter vir drie jaar opgeskort. Hy het gemeenskapsdiens gedoen.”
Masiya het ook bevestig dat ‘n verkoolde lyk Woensdagmiddag op ‘n plaas in Magaliesburg gevind is, maar het gesê die polisie wag op die resultate van forensiese toetse voordat die lyk uitgeken kan word.
De Waal is Woensdagoggend ontvoer toe sy skool toe gestap het in White Ridge, Florida, wes van Johannesburg.
- Volg Nuus24 op Twitter
- SAPA