Louise se ma: 'Ek sal jou nie vergewe'
2011-10-14 14:14
Johannesburg – Die bedroefde ma van Louise de Waal het gesê sy sal die man wat haar dogter ontvoer en vermoor het, nooit vergewe nie.
Louise is Woensdag ontvoer toe sy op pad skool toe was. Haar verbrande lyk is later in Magaliesburg gevind en kon slegs deur haar juwele uitgeken word.
Cherise de Waal het kort ná die verdagte se inhegtenisneming aan Eyewitness News gesê sy sukkel om te beskryf hoe sy voel.
"Ek wil hê hy moet ly soos my dogter gely het."
Sy het gesê hoewel die verdagte in hegtenis geneem is, sal dit nie haar dogter terugbring nie.
"Dit bring my geen troos nie."
Die man het Louise na bewering ontvoer en vermoor en aan die polisie gesê hy het "gehou van hoe sy lyk", het Times Live berig.
Die man is onder polisiebewaking na Gauteng gebring en sal Maandag, op aanklagte, insluitend twee aanklagte van moord en "verskeie aanklagte van ontvoering, verkragting en seksuele aanranding" in die hof verskyn, het ao. Peet du Toit, ondersoekbeampte, gesê.
Du Toit het gesê die ander aanklagte moet nog gefinaliseer word.
– Lees meer hier
– Volg Nuus24 op Twitter