Lotz-saak: deskundige oor afdruk gepols
2010-12-08 18:12
Kaapstad - ‘n Voormalige forensiese deskundige van die polisie is Woensdag daarvan beskuldig dat hy ‘n “totaal misleidende” verslag gegee het oor skoenafdruk-bewyse in die Inge Lotz-moordsaak.
Die kenner, Bruce Bartholomew, het getuig in die voormalige beskuldigde van die moord op Inge Lotz, Fred van der Vyver, se R46 miljoen-eis weens onregmatige vervolging teen die minister van polisie.
Hy het in die Kaapse Hooggeregshof getuig hy was oortuig dat ‘n bloedmerk op die badkamervloer van Lotz se woonstel in Stellenbosch ooreengestem het met ‘n skoen wat aan Van der Vyver behoort het.
Die polisie het ingestem om te betaal vir sy reis na Amerika om met die wêreldbekend skoenafdruk-deskundige Bill Bodziak te konsulteer. Hy het gesê Bodziak het gemeen daar was ‘n “goeie kans” dat ‘n ronding in die bloedmerk deur dié skoen veroorsaak is.
Hy en Bodziak kon egter nie ‘n skoenafdruk produseer wat die merke pas wat na bewering deur sandkorrels in ‘n ronding van die sool gemaak is nie.
Bartholomew het gesê hy het nie die indruk gekry dat Bodziak dink hy probeer so te sê bloed uit ‘n klip tap nie.
Hy het verstaan Bodziak het in ‘n mate met hom saamgestem, maar dat Bodziak gevoel het hy moet “baie versigtig” oor die sandkorrels wees.
Bartholomew het gesê hy het na Suid-Afrika teruggevlieg en was tevrede dat die skoen by die bloedmerk gepas het en dat hy die sandkorrels as “bykomende identifiserende kenmerke” kan gebruik.
Onder kruisondervraging deur Van der Vyver se regsverteenwoordiger, adv. Dup de Bruyn, het hy erken ‘n verslag oor sy besoek aan Bodziak het geensins Bodziak se twyfelinge oor die sandkorrels genoem het nie.
“Die verslag is in hierdie verband totaal misleidend,” het De Bruyn gesê.
Toe Regter Anton Veldhuizen hom vra of hy kan sê hoekom hy nie vroeër dié kwessie opgehaal het nie, het Bartholomew gesê: “Nee, ek kan nie.”
“Sou jy saamstem dat dit iets baie belangrik is?” het Veldhuizen gevra.
“Dit is korrek,” het Bartholomew gesê.
- Volg Nuus24 op Twitter
- SAPA
