Lotz-moord: Lipmerk dalk net handafdruk
2010-12-05 09:35
Rapport
’n Gautengse oud-polisieman en vingerafdruk-deskundige, Koos Bierman, is deur die minister van polisie gevra om in die eissaak van Fred van der Vyver te getuig.
Van der Vyver is op 29 November 2007 vrygespreek van die moord op die Stellenbosse student Inge Lotz. Hy eis nou R46 miljoen van die polisie omdat hy glo “kwaadwillig” vervolg is.
Sy regspan voer aan die polisie het sy vingerafdruk van ’n drinkglas gelig en op ’n DVD-houer “geplant”. Hierdeur, sê die regspan, is die beginsel van regverdigheid in die gedrang gebring.
Die minister van polisie staan Van der Vyver se aansoek teen en vra die hof om die saak met koste van die hand te wys.
Die polisie sê voorts hulle gaan getuienis lewer dat die direkteur van openbare vervolging (DOV) in geen opsig in ’n besluit oor vervolging of die staking daarvan deur enige polisielid met vals verklarings mislei is nie.
Van der Vyver was die afgelope week nie in die hof nie.
Die hof het Donderdag gehoor Bierman het in die 1980’s ’n lid van die “Boere-mafia” help vastrek.
Dít het hy gedoen deur die “velvoue” van ’n wys- en middelvinger op tjeks positief met die verdagte te verbind. Die verdagte het dié tjeks uit sy hempsak gehaal.
Bierman se getuienis het nuwe inligting oor wat “werklik” op die veelbesproke folien 1 (die afdrukke en merke glo van die DVD-houer gelig) is, na vore laat kom.
Bierman moes voor sy hofverskyning folien 1 bestudeer en ontleed, die foto van folien 1 ontleed en ook bepaal of die afdrukke daarop van die oorspronklike DVD-houer afkomstig is. Hy moes ook die “lipmerk” ontleed en alle beweringe ondersoek dat die vingerafdruk nie van die DVD nie, maar van ’n drinkglas gelig is.
Bierman het getuig dat hy vooraf “honderde” proefnemings op ’n soortgelyke DVD-houer gedoen het. Hy het dié “toetse” met “nat” en “droë” lippe op ’n droë glas en later ’n nat glas gedoen. Hy het vier blokkies ys in ’n glas water geplaas en dit tien minute lank laat staan.
In al die toetse is lip- en vingerafdrukke geneem.
Hy kon egter “nie één” afdruk produseer soortgelyk aan die “lipmerk” op die DVD-houer nie.
Ook kon die “lipmerk” nie aan enige lipklassifikasie voldoen nie.
Hy het die “lipmerk” geëien as die merk wat die blou Dermagrip-handskoen van die polisie se vingerafdruk-deskundige moontlik gelaat het toe die DVD-houer tussen die wys- en middelvinger gehou is.
Die “naelmerk” op dié afdruk, het Bierman gesê, is die “duikie” – ’n “vervaardigingskenmerk” – in die handskoen se vingerpunt.
Oor dié “klomp” inligting het adv. Dup de Bruyn, Van der Vyver se regsverteenwoordiger, in die doodsnikke van die sitting heftig beswaar aangeteken. Regter Anton Veldhuizen het De Bruyn saggies gemaan: “Moenie bekommerd wees nie, ons sal daardie brug oorsteek wanneer ons daar kom.”
Uit Van der Vyver se kamp het iemand se opmerking: “Moenie nou al die handskoene uittrek nie,” gedempte lagbuie in die halfleë hof ontketen.
Vroeër die week het Mariaan Booysens (’n voormalige vingerafdruk-deskundige), dr. Linda Liebenberg (forensiese patoloog) en brig. Ruben Botha (vingerafdruk-deskundige) ook getuig.
Bierman getuig Maandag verder.
- Rapport