Lonmin-slagting regering se skuld – Malema

2012-08-26 13:33

Johannesburg – Die Suid-Afrikaanse regering is verantwoordelik vir die "slagting" by die Marikana-myn vroeër vandeesmaand, het Julius Malema, voormalige woordvoerder van die ANC-jeugliga, gesê.

Malema het Sondag in 'n berig wat in die City Press gepubliseer is, gesê die regering het die "politieke mag" gehad om die slagting te verhoed.

"Die jeugliga is sedert 2008 die enigste stem wat die mynwerkers se belange en drome verdedig.

"Hoe verduidelik en regverdig jy die realiteit dat rotsbrekers so min as R4 000 verdien? Hoe verduidelik jy die toestande waarin die Marikana-werkers woon?" het hy gevra.

Malema het gesê toe die jeugliga oor die kwessies gepraat het, het pres. Jacob Zuma hul bekommernisse ignoreer.

Hy het gesê Zuma het mynwerkers en beleggers verseker "dat die Suid-Afrikaanse regering nie die toestande van werkers en enige beleid wat verband hou met mineralebestuur sal verander nie".

Die slagting kon verhoed word deur die regulering van myne en die aanstelling van 'n meer ervare polisiehoof, het Malema gesê.

Altesaam 34 stakende mynwerkers is dood by Lonmin se Marikana-myn toe die polisie op die groep losgebrand het.

– Volg Nuus24 op Twitter

- SAPA