Lonmin-slagting: Families soek antwoorde
2012-08-17 14:27
Rustenburg – Familielede van mynwerkers wat Donderdag by die Marikana-myn in 'n gewelddadige botsing met die polisie betrokke was, het Vrydag by Lonmin se Andrew Saffy-gedenkhospitaal in die Noordwes saamgedrom om na hulle geliefdes te soek.
Altesaam 34 mynwerkers is dood toe die polisie met skerp ammunisie op stakende werkers geskiet het.
"Ek wens hulle reik 'n verklaring uit wat al die slagoffers se name op het, of sê vir hulle in watter hospitale hulle familielede is, want ons hardloop van bakboord na stuurboord," het Gcobani Tiya, een van die familielede, gesê.
Hy het van Bethal na Rustenburg gery omdat hy geen inligting kon kry nie, het hy gesê.
Hy het gesê dit lyk of die myn inligting vir die media en die polisie gee, maar nie aan die families nie.
'n Beampte van die hospitaal het gesê van die gewondes is na hospitale in Johannesburg, Rustenburg en Pretoria gestuur.
Sy het gesê sy het nie toestemming om met die media te praat nie, en het gevra dat haar naam nie bekendgemaak word nie.
Riah Phiyega, die nasionale polisiehoof, het Vrydag in 'n mediakonferensie bevestig dat die sterftesyfer tans op 34 staan. Meer as 78 mense is ook in die voorval beseer, het sy gesê.
Altesaam 259 mense is in hegtenis geneem vir aanklagte van onder andere openbare geweld, moord, poging tot moord, die besit van gevaarlike wapens en opsetlike saakbeskadiging.
"Dit is nie nou tyd vir blameer en vinger wys nie. Dit is 'n tyd vir ons om te rou. Die polisie moes geweld gebruik om hulself teen die groep te beskerm," het Phiyega gesê.
– Volg Nuus24 op Twitter.
- SAPA
