'Moenie vinger wys oor slagting' – polisiehoof

2012-08-17 12:58

Kaapstad – Altesaam 34 mense is Donderdag dood in die gewelddadige konfrontasie tussen die polisie en stakende werkers by Lonmin se Marikana-myn naby Rustenburg, het die polisie Vrydag in 'n mediakonferensie gesê.

Meer as 78 mense is ook in die voorval beseer, het die polisie bekendgemaak.

Altesaam 259 mense is in hegtenis geneem vir aanklagte van onder andere openbare geweld, moord, poging tot moord, die besit van gevaarlike wapens en opsetlike saakbeskadiging, het Riah Phiyega, die nasionale polisiehoof, gesê. 

"Dit is nie nou tyd vir blameer en vingerwys nie. Dit is 'n tyd vir ons om te rou. Die polisie moes geweld gebruik om hulself teen die groep te beskerm," het Phiyega gesê.

Phiyega het 'n volledige oorsig oor die verwikkelings by die myn oor die afgelope paar weke gegee. Sy het onder andere verduidelik hoe twee polisielede deur mynwerkers doodgekap is, en het meer besonderhede verskaf oor wat Donderdag op die toneel gebeur het.

"Ons het gister [Donderdag] weer 'n groot polisieteenwoordigheid gehad... en ons het skarebeheermaatreëls soos waterkanonne en doringdraad beskikbaar gehad, indien dit nodig sou wees om dit te gebruik.

"Ons het vroegmiddag by verskeie bronne gehoor dat die betogers nie die gebied wil verlaat nie."

Die besluit is daarna geneem om betogers te verjaag en om hulle in kleiner groepies op te breek, wat vir die polisie makliker sou wees om te beheer, het Phiyega verduidelik.

Die groep gewapende betogers is met rubberkoeëls, traangas en waterkanonne verdryf.

"Die gewapende betogers is uit hulle vesting gedryf na 'n beboste gebied. Die polisie het daarna die betogers uit die beboste gebied probeer verjaag."

Dis in dié stadium wat 'n groep betogers op die polisie afgestorm het. Die polisie het volgens Phiyega in reaksie hierop uit selfverdediging geskiet.

Ses vuurwapens is later by betogers afgeneem, het sy gesê.

Die slagting by dié myn in die Noordwes het internasionaal opslae gemaak.

The Guardian, New York Times, Sky News, Denver Post, die BBC, Washington Post, CNN en verskeie ander nuusbronne het oor die slagting berig.

Die aanlyn-ensiklopedie Wikipedia het ‘n bladsy daaroor gepubliseer met verwysings na plaaslike koerante en verslaggewers.

Mense oor die wêreld heen het ook sosiale netwerke soos Facebook en Twitter gebruik om te hul opinies te deel oor wie hulle dink verantwoordelik was vir die bloedbad.

Sommige waarnemers glo die polisie is verantwoordelik en vra waarom skerp ammunisie gebruik is.

Ander blameer die maatskappy omdat hy nie op werkers se versoeke reageer het nie.

Die rand het ook swakker teen die Amerikaanse dollar verhandel ná die voorval. Die rand het teen vroeg Vrydagoggend teen 0,34% swakker op R8,25 teen die dollar verhandel, nadat dit Donderdag teen sluitingstyd in New York op R8,22 gestaan het.

'n Handelaar het gesê hoewel berigte oor die bloedbad baie internasionale dekking geniet sal dit nie 'n langtermyn-uitwerking op die waarde van die rand hê nie.

Swaar gewapende polisiebeamptes het Vrydag die toneel by die Marikana-myn in die Noordwes gepatrolleer.

– Volg Nuus24 op Twitter.