Lonmin: Stakers wil kollegas se dood wreek

2012-09-10 20:21

Rustenburg – ‘n Groot groep stakende mynwerkers het Maandag by die ingang van een van Lonmin se platinum-myne betoog.

Die optog het glo in Wonderkop, ‘n gebied naby Marikana, begin.

Die polisie het die ingang van die myn vir die werkers met motors versper. Leiers van die stakers het saam met die polisie die myn se perseel binnegegaan.

Vroeër het die leier van die stakers, Anele Nogwanya, gesê hulle sal na verskillende mynskagte in die gebied stap en die opskorting van alle myn-bedrywighede eis.

“Mynaktiwiteite by die oostelike platinum-myn moet gestaak word omdat die wekers onderbetaal is,” het Nogwanya gesê.

“Ons het nou ons kollegas begrawe. Nou is die tyd om ons belofte aan hulle na te kom en die R12 500 te kry.”

“As ons aanhou werk sonder die R12 500, sal ons kollegas wat dood is teen ons draai.”

Nogwanya sê die groep sal daarop aandring dat nie-stakende werkers by hulle aansluit.

 – Volg Nuus24 op Twitter

- SAPA