Lonmin: Rouklaers sak inmekaar
2012-08-23 13:41
Rustenburg – Dr. Aaron Motsoaledi, minister van gesondheid, het chirurgiese handskoene aangesit en gehelp om rouklaers wat by ‘n gedenkdiens in Marikana in die Noordwes ineengestort het, te behandel.
Paramedici het hul hande vol gehad toe rouklaers emosioneel geraak het gedurende die diens vir 34 mynwerkers, wat ‘n week gelede in die gebied in ‘n skietery met die polisie gesterf het.
Meer as 1 000 Wonderkop-inwoners en talle geestelikes het in ‘n markiestent naby die informele nedersetting bymekaargekom.
Die SABC berig die regering het sy gedenkdiens afgestel om die gemeenskap se diens by te woon.
Floyd Shivambu (voormalige woordvoerder vir die ANC se jeugliga), Nathi Mthethwa (minister van polisie), Collins Chabane (minister in die presidensie), Motsoaledi, Richard Baloyi (minister van samewerkende regering), Thandi Modise (premier van die Noordwes) en die burgemeester van Rustenburg, Mpho Khonou, het die diens bygewoon.
Thabo Makgoba, Anglikaanse aartsbiskop, het vir die roubeklaers gesê geweld sal nooit ‘n probleem oplos nie.
“Laat ons nie mekaar dood maak nie... vergewe, moenie wraak neem nie.”
Dis ook hoogtyd dat politici ophou om die tragedie te gebruik om politieke punte aan te teken, het hy gesê.
Rouklaers kon tydens Makgoba se spreekbeurt nie teen die emosie veg nie. Sommige het geskree en gehuil.
Volg Nuus24 op Twitter
- SAPA
