Lonmin: Bloed loop ná rubberkoeëls spat

2012-09-15 15:00

 Rustenburg – Polisiebeamptes wat Lonmin-mynwerkers uitmekaar gejaag het, word daarvan beskuldig dat hulle Saterdagoggend inwoners van die Nkaneng- informele nedersetting in Marikana geskiet het.

Sapa berig talle gemeenskapslede het met bebloede wonde verskyn. Die inwoners beweer die polisie se rubberkoeëls het die beserings veroorsaak.

“Ek verstaan nie hoekom die polisiebeamptes my geskiet het nie. Ek het aan die deur van ‘n winkel geklop en polisiebeamptes binne ‘n voertuig het my in die been geskiet,” het ‘n slagoffer aan die nuusagentskap gesê.

Die aantal mense wat beseer is, is onbekend.

AFP het vroeër berig die polisie het vroegoggend klopjagte op mynwerkers se wonings in die gebied uitgevoer.

Thulani Ngubane, ‘n polisiewoordvoerder, het aan die nuusagentskap gesê sowat 500 polisiebeamptes het aan die klopjagte deelgeneem.

Polisiebeamptes het op ‘n groot aantal knopkerries, pangas en ander gevaarlike wapens beslag gelê.

Dit kom ook nadat die regering vroeër aangekondig het dat hy “onwettige saamtrekke” nie sal duld nie en dat stakers se wapens van hulle weggeneem sal word.

Volg Nuus24 op Twitter