Lolly as ‘ongeslypte diamant’ gehuldig
2010-05-11 06:45
Johannesburg - Lolly Jackson was ’n ongeslypte diamant met gewoontes en optredes wat soms, veral as mense hom nie geken het nie, aanstoot gegee het.
Dít is hoe Vincent Marino, vriend en medeskrywer van Jackson se outobiografie, die vermoorde Teazers-ontkleeklubbaas gister by sy begrafnis beskryf het.
Sowat 100 familielede, vriende en werknemers het by die Suidpark-begraafplaas in Germiston aan die Oos-Rand bymekaargekom vir die begrafnis.
’n Bus, gepak met ontkleedanseresse, werknemers en uitsmyters van die klubs, het reeds om 10:30 by die begraafplaas opgedaag en in die wind en herfssonnetjie gesels en sigarette gerook.
Kort ná 11:00 het die stoet by die begraafplaas opgedaag. Jackson se vrou, Demi, en sy drie kinders, Manoli, Samantha en Julian, asook hul vriende het in ’n Hummer agter die lykswa gery.
Die diens, wat deur ’n Grieks- Ortodokse priester gelei is, het skaars 15 minute geduur waarna vriende en familie blomme of sand op die kis gegooi het.
Sy vrou het die Griekse vlag, waarmee sy met gereelde tussenposes haar trane afgevee het, oor die kis gegooi voordat die graf toegegooi is.
Die danseresse was minder aangedaan oor die verlies van hul werkgewer. Die meeste van hulle het onderlangs met mekaar gesels en was eerste om weer in die bus te klim.
“Hy was ’n ‘super guy’ wat die lewe voluit geleef het,” het sy broer Costa ná die begrafnis gesê. “As jong broers was hy altyd daar vir ons. Ons het baie pret gehad, maar was ook gereeld in die moeilikheid.”
Hul ander broer, Michael, dien tans tronkstraf uit in die Pollsmoor-tronk nadat hy ’n straatkind in Kaapstad doodgeskiet het.
Sean Newman, woordvoerder van Teazers, het ná die begrafnis gesê die gesin en familie vra nou privaatheid. “Ons het ’n pa, broer, eggenoot en werkgewer begrawe. Gee ons ’n bietjie ruimte,” het hy gesê.
Die familie en Teazers gaan nie meer verklarings uitreik oor die ondersoek nie, het hy gesê.
Jackson is verlede Maandagaand in ’n huis in Edleen, Kempton Park, doodgeskiet.
- Die Burger
- Die Burger