Loerbroer kom na Loftus
2010-09-30 07:01
Pretoria - Rugbykykers op Loftus Versfeld gaan voortaan deur kameras dopgehou word sodat diegene wat drink, rook, vloek of hulle aan rassistiese gedrag skuldig maak, vasgevat kan word.
Oortreders wat deur enige van die 67 kameras in die stadion betrap word, kan op die groot skerm in die stadion uitgewys word.
Die waarskuwing kom van Barend van Graan, uitvoerende hoof van die Blou Bulle Maatskappy, wat gesê het oortreders loop die gevaar om nie weer by die Blou Bulle se heiligdom toegelaat te word nie en kan aan die polisie oorhandig word.
Van Graan het toeskouers gister in ’n verklaring daaraan herinner dat Loftus ’n rookvrye stadion is en dat daar riglyne oor ongewenste gedrag bestaan.
Hy het gesê toeskouers wat swak gedrag sien, kan ’n veiligheidswag se aandag trek, die stadion bel of ’n SMS stuur.
“Indien u onderwerp word aan rassisme, viktimisering, dronkenskap of swak taalgebruik neem asseblief die vrymoedigheid om die beheerkamer te kontak by: 012 420 0787 of 076 524 7590 (SMS). Gee asseblief besonderhede van u sitplekkaartjie deur,” het hy gesê.
Volgens hom was daar nie ’n spesifieke geval wat tot dié optrede gelei het nie.
“Ons was wel bewus van voorvalle oor ’n lang tyd en wil dit nou uitskakel. Ons verkoop seisoenkaartjies aan skoliere en jong geesdriftiges en hulle verdien ook nie sulke gedrag nie,” het Van Graan gesê.
Bly op hoogte van al die jongste sportnuus deur Nuus24Sport op Twitter te volg.
- Sport24