Locnville glo deur polisie aangeval
2011-06-09 08:11
Kaapstad – Die gewilde Suid-Afrikaanse musiekduo Locnville is woedend nadat hulle glo by 'n vulstasie in Claremont deur die polisie aangerand is.
Andrew Chaplin beweer hy en sy tweelingbroer, Brian, het Donderdagoggend saam met 'n vriend by die vulstasie gestap toe hulle deur 'n groep mense beledig is wat nie van hul musiek hou nie.
Die sanger het erken dat hulle gedrink het, maar sê hulle het nie die polisie uitgelok nie.
"Iemand het iets onvanpas aan ons gesê en om een of ander rede het die polisie ons gevolg, in die middel van die pad afgetrek en aangeval. Daarvoor kan ek nie staan nie," het Chaplin gesê.
Hy het gesê die polisie het sy broer met pepersproei gespuit en sy vriend se neus gebreek.
Chaplin het gesê beamptes by die Claremont-polisiekantoor wou hom nie toelaat om 'n formele klag in te dien nie.
"Ons het die polisiekantoor gebel en 'n formele klag probeer indien, maar hulle het verskeie kere die foon neergesit."
Lt.kol. André Traut, Wes-Kaapse polisiewoordvoerder, het bevestig dat die polisie Donderdagoggend 'n oproep van 'n lid van die publiek ontvang.
Traut het die persoon as "duidelik onder die invloed van alkohol" beskryf.
"Ons het 'n oproep van 'n lid van die publiek ontvang wat beweer hy is aangerand deur die polisie. Ons het hom aangemoedig om na vore te kom en die saak aan te meld."
Traut het gesê die polisie kan nie verder kommentaar lewer of die identiteit van die persoon bekend maak voor die mans wat vermoedelik aangerand is, 'n klag by die polisie ingedien het nie.
Lees meer hier
Volg Nuus24 op Twitter