Lindley-moord: Verdagte SMS met dooie se foon
2011-06-02 08:17
Bloemfontein - Enkele ure nadat die Potgieter-gesin van Lindley op die plaas Tweefontein vermoor is, het een van hul vermeende moordenaars die selfoon van Wilna Potgieter gebruik om ’n SMS-boodskap mee te stuur, is Woensdag in die Vrystaatse hooggeregshof getuig.
Minstens twee van die ses beskuldigdes wat van die moorde op 1 Desember verlede jaar op die plaas Tweefontein aangekla word, word met DNS-toetse van bloed van Attie Potgieter wat op hul klere gekry is, verbind.
Die staat sal sy saak in dié moordverhoor voor regter G.F. Wright waarskynlik vandag sluit wanneer die ondersoekbeampte, speurder-ao. Danie Bierman van die eenheid teen georganiseerde misdaad op Phuthaditjhaba, se getuienis afgehandel is.
Bierman het Woensdag getuig volgens die selfoonstate wat hy van die Potgieter-egpaar se selfone en twee van dié van die beskuldigdes gekry het, het Telleko Seekoei om 21:09 op 1 Desember met sy eie simkaart in mev. Potgieter se selfoon ’n SMS-boodskap gestuur.
Hy het ook die volgende oggend net voor 06:00 twee keer na die selfoon van Vusi Khumalo gebel. Mev. Potgieter se selfoon is ook aan Seekoei gekry toe hy in hegtenis geneem is.
Dié selfoonnommer van Khumalo, ’n plaaswerker op Tweefontein, was op mnr. Potgieter se naam geregistreer en dus ’n werkfoon wat hy by hom gehad het.
Bierman het ook getuig bloed op die baadjie en skoene van Diphapang Motaung word met die DNS van mnr. Potgieter verbind.
Bloed aan ’n pistool wat op die werf waar Motaung woon in ’n sak gekry is, word ook met mnr. en mev. Potgieter verbind.
Op die klere, wat luidens getuienis aan Seekoei behoort, is ook bloed gekry wat met mnr. Potgieter verbind word.
Op ’n panga, wat gekry is op die dak van die huis waarin Khumalo op Tweefontein gewoon het, is bloed gekry wat met mnr. Potgieter en sy dogtertjie, Wilmientjie (2), verbind word. Hy het getuig aan die sleutels van mnr. Potgieter se Nissan-werkbakkie wat in mev. Potgieter se handsak gekry is, was bloed van mnr. en mev. Potgieter.
Kapt. Renier Schutte van die polisie op Bela-Bela wat Seekoei op 4 Desember vergesel het toe Seekoei op die plaas gaan uitwysings doen het, het getuig Seekoei het aan hom gesê hulle was twee dae voor die tyd al op Tweefontein by Khumalo se huis en het “beplanning gedoen”.
Die dag van die aanval was hy en Motaung in ’n buitekamer en het deur ’n venster gekyk hoe die bakkie op die plaas aankom.
Terwyl hulle daar gewag het, het ’n beseerde man om die hoek gekom. Tshokolo Lelale het hom met ’n vurk (tuinvurk) gesteek en toe weggehardloop.
“Ek en Mopapa (Motaung) het die blanke man toe in die kamertjie ingebring en was besig om hom vas te maak en geld te eis, toe ons twee skote hoor. Ons het gedink dit is bure wat kom help. Ons het niks gesien nie,” het Seekoei aan hom gesê.
Regter Wright het die uitwysings voorlopig toegelaat. Seekoei ontken dat hy dit gesê het en dat hy vrywillig die uitwysings gedoen het.
Die vier vermeende moordenaars en Stemmer Mofokeng en Klaas Mofokeng ontken dat hulle die Potgieter-gesin vermoor het.
Adv. Jannie Botha tree vir die staat op. Advv. Pieter Nel, Lawrence Tshabalala, Oupa Makhene, Chris Gerber en Leona Smit tree vir die beskuldigdes op. Prof. Rita-Marie Jansen staan regter Wright as assessor by.
Die verhoor duur voort.
- Volksblad