Lindley-moord: Plaaswerkers het glo getwyfel
2011-06-01 07:11
Bloemfontein - Twee van die plaaswerkers van Attie Potgieter van Lindley het ernstig begin twyfel oor die plan om hul werkgewer vir die geld in sy kluis te vermoor, blyk uit ’n verklaring wat Dinsdag in die Vrystaatse hooggeregshof uitgelees is.
Dit blyk ook uit die verklaring van Stemmer Mofokeng (22), een van die ses beskuldigdes in die moordverhoor, dat hy en twee van die ander plaaswerkers langer as ’n week voor 1 Desember verlede jaar al gepraat het oor die moontlikheid om Potgieter te vermoor.
In die verklaring wat voor landdros Estrelita von Maltitz van Bethlehem afgelê is, sê Mofokeng toe Vusi Khumalo met hom en Klaas Mofokeng oor die beplande moord gepraat het, het hulle saamgestem.
Toe Khumalo weg is, het hulle weer daaroor gepraat en toe nie meer saamgestem nie. Hulle het twee dae later vir Khumalo gesê dit is beter om dié plan te los.
Later toe hy en Khumalo weer gepraat het, was hy (Mofokeng) onwillig om deel te neem, maar Khumalo het aangedring om dit te doen.
Die middag van die skietery het hy in die blomtuin van die plaasopstal van Tweefontein gewerk. Toe hy die honde hoor blaf en opkyk, sien hy die drie mans wat van Khumalo se huis af na die opstal loop.
Tshokolo Lelala was met ’n panga gewapen. Telleko Seekoei het ’n vuurwapen in sy hand gehad. Hy het die derde man nie geken nie.
Hy het toe van Khumalo se planne onthou en na ’n pakhuis weggehardloop.
“Ek het gedink dit sal nie eens help om hulle te keer nie, want hulle kan my ook doodmaak.” Hy en die ander twee werkers is in ’n trekkerskuur in. Mnr. Potgieter was op pad na sy huis toe en het langs Khumalo se huis verby gery.
Toe het hulle ’n skoot uit ’n vuurwapen gehoor en iemand het gehuil. Hulle het by ’n venster gestaan en kyk wat aangaan.
“Attie het hardlopend in die rigting van die stoor gekom en Telleko en Tshokolo het hom gejaag. Attie was toe gesteek deur Telleko en Tshokolo het hom met die panga gekap.
“Attie het toe vir Tshokola gegryp en hom op die grond vasgedruk en hulle het baklei (gestoei) oor die panga.
“In hierdie proses was Telleko besig om vir Attie met die mes te steek. Attie het toe vir Tshokolo gelos en vir Telleko gekyk.
“Daarna het Telleko hom gesteek en Tshokolo het hom gekap. Hulle het wegbeweeg na die skaapkraal.”
Hy sê ook in sy verklaring: “Telleko het vir ons gesê dat Attie se vuurwapen is die vuurwapen wat die kind en ’n vrou doodgeskiet het. Tshokolo het vir ons gesê dit is Telleko wat hulle geskiet het.”
Die drie plaaswerkers, Lelala, Seekoei en Diphapang Motaung, ontken voor regter G.F. Wright dat hulle Potgieter, sy vrou, Wilna, en hul dogtertjie, Wilmientjie (2), op 1 Desember verlede jaar op die plaas Tweefontein beroof en vermoor het.
Adv. Jannie Botha tree vir die staat op. Advv. Pieter Nel, Lawrence Tshabalala, Oupa Makhene, Chris Gerber en Leona Smit tree vir die beskuldigdes op. Die verhoor duur voort.
- Volksblad