Lindley: 'Vrou moes kluis oopmaak'
2011-06-07 18:58
Bloemfontein - ‘n Beskuldigde in die moordverhoor van die Potgieter-gesin – wat op hul plaas by Lindley vermoor is – het Dinsdag getuig die plan was om die boer se vrou sover te kry om die huis en die kluis tydens die rooftog oop te maak.
Paulus Khumalo het onder kruisondervraging deur die staat in die Bloemfonteinse Hooggeregshof getuig dié wat die rooftog uitgevoer het, moes eintlik die boer Attie Potgieter aanhou terwyl sy vrou aangesê sou word om die huis en die kluis oop te maak.
“Ek kan nie antwoord nie,” het Khumalo gesê toe Jannie Botha, staatsaanklaer, hom gevra het wat die plan was indien die boer en sy vrou nie saamgewerk het tydens die rooftog nie.
“Hoekom nie? Jy kan beter doen as dit,” het Botha aan Khumalo gesê.
“Ek weet nie,” het Khumalo deur middel van ‘n tolk gesê.
Khumalo en vyf ander mans, tussen die ouderdomme van 18 en 33, word daarvan beskuldig dat hulle die boer, sy vrou Wilna Potgieter en hul twee maande oue dogtertjie, Wilmien, op 1 Desember 2010 vermoor het.
Khumalo het getuig hy het niks gedoen terwyl hy gesien het hoe twee ander beskuldigdes met Potgieter baklei het nie, al was die boer vol bloed.
Khumalo het gesê die plan was net om die paartjie te vermoor en dat die plan “glad verloop het” in ‘n stadium.
“Geen plan, geen plan om dood te maak nie,” het hy getuig oor die rede waarom daar ‘n vuurwapen teenwoordig was.
Khumalo het bevestig dat die kind hom en die twee ander plaaswerkers wat van die moord beskuldig word, sou ken.
Hy het egter die staat se aantyging dat die kind doodgemaak is sodat hulle nie uitgeken kan word nie, ontken.
“Daar was geen rede nie. Vra die een wat dit gedoen het,” het Khumalo geantwoord.
Khumalo se verdediging is Dinsdag afgesluit, terwyl nog ‘n beskuldigde, Tshekolo Letlala, deur sy regsverteenwoordiger geroep is om in sy eie verdediging te getuig.
Letlala het gesê hy was op die plaas die nag van die moord, maar hy weet niks van die voorval nie.
- Volg Nuus24 op Twitter
- SAPA