Limpopo-boer en vrou se lyke verkool in kar gekry
2010-12-19 06:57
’n Dag nadat ’n egpaar van ’n wildsplaas buite Thabazimbi in Limpopo
hul Kersinkope saam met hul drie dogters in Rustenburg gedoen het, is
hul lyke in die bagasiebak van hul uitgebrande Land Cruiser-stasiewa
gevind.
Die vrou het nog die vorige dag haar ma, Doll Bosch, se 74ste verjaardag gevier.
Casper Aucamp (55) en sy vrou, Daleen (52), is Woensdagaand
vermoedelik kort ná hul terugkeer op hul plaas, Vandas, oorval en
vermoor terwyl hulle besig was om die Kersgeskenke af te laai.
Aucamp se gereedskapskis, wat hy altyd agterin die voertuig
vervoer, en ’n plas bloed by die ingang van die huis dui daarop dat die
egpaar pas by die huis ingestap het toe hulle aangeval is.
Hul lyke is eers Donderdagoggend in die bagasiebak van hul
uitgebrande voertuig op ’n verlate grondpad sowat 25km buite Dwaalboom
gevind.
“Toe hulle nie oudergewoonte bel om te laat weet hulle is veilig by
die huis nie het ons onraad begin vermoed,” sê hul jongste dogter, Leonie Mans (24).
Sy en haar suster Mandie Prodehl (32) het ’n buurman gebel om
te gaan ondersoek instel, maar die plaashekke, huisdeure en vensters was
glo gesluit.
Mans en Prodehl het self na die plaas uitgery en die tuinwerker gevra waar hul ouers en hul voertuig is.
Volgens Mans het hy glo gesê dat haar ouers voer in Dwaalboom gaan koop het.
“’n Familievriend het ons daarna gebel en gesê daar is ’n
uitgebrande Cruiser op ’n grondpad buite Dwaalboom gevind,” sê Prodehl.
Met hul aankoms op die toneel was die polisie reeds met ’n ondersoek besig.
“Ons het dadelik gesien dit is ons ouers se voertuig, maar die
polisie het ons eers later die middag gebel en ingelig dat daar twee
verkoolde lyke in die kattebak gevind is.”
Die susters het hul ouers uitgeken deur hul juwele te identifiseer.
“Die polisie sê dit lyk darem of hulle reeds dood was toe die brand begin het,” sê+Mans.
Die saak is deur die Dwaalboom-polisie bevestig, maar hulle wil in dié stadium geen verdere inligting bekend maak nie.
“Ons het wel ’n plas bloed by die huisingang gekry, maar het nog
nie bevestig aan wie dit behoort het nie en nog geen verdagtes is
aangekeer nie,” het ’n polisiebeampte gesê.
Hulle wou geen kommentaar lewer oor Mans se opmerking dat bebloede
klere en ’n mop in die tuinwerker, wat nou vermis word, se kamer gekry
is nie.
Niks is uit die huis gesteel nie en die ondersoek duur voort.
Die Aucamp-egpaar word ook deur hul ander dogter Linda Botes
(29) en twee Prodehl-kleinkinders, Marlie (6) en Antoinette (5),
oorleef.
Botes het Vrydagaand op haar Facebook-profiel geskryf:
“Trane loop en die verlange om te weet jy gaan nooit weer jou ma en pa sien nie en nooit weer kan sê mams, paps, i love u.”
- Rapport