Limpopo-amptenaar vas oor vals kwalifikasies

2013-01-10 07:17

Johannesburg – 'n Senior amptenaar van Limpopo is Woensdag in hegtenis geneem ná sy vals kwalifikasies gebruik het om 'n pos by 'n munisipaliteit los te slaan, het die polisie gesê.

Die 30-jarige vrou was 'n senior bestuurder by die Tzaneen-munisipaliteit, en het 'n salaris van R2,5 miljoen verdien, het brig. Hangwani Mulaudzi gesê.

Sy het meer as drie jaar vir die munisipaliteit gewerk.

"Volgens die inligting wat ons ontvang het, het die verdagte in die waterwese-departement van die munisipalteit gewerk sedert sy in November 2009 vir die pos aansoek gedoen het."

Sy het verlede jaar vir 'n ander pos by die Waterberg-munisipaliteit aansoek gedoen. Sy is uitgevang toe die munisipaliteit haar kwalifikasie in ingenieurswese van die Tshwane Universiteit van Tegnologie wou bevestig. Die saak is by die polisie aangemeld, en die polisie het haar in Pretoria in hegtenis geneem.

Sy sal Donderdag in die Tzaneen-landdroshof verskyn.

– Volg Nuus24 op Twitter.

- SAPA