Libië-besoek skaad Zuma se beeld
2011-06-02 07:07
Den Haag - Pres. Jacob Zuma se mislukte bemiddelingspoging om ’n einde aan die burgeroorlog in Libië te maak het sy beeld in die Weste nie goed gedoen nie. Inteendeel, dit het hom aansienlik negatiewe publisiteit besorg.
Die meeste koerante in Europa en Amerika het in feitelike berigte daarop gewys dat Zuma se sending na Tripoli misluk het. Maar ’n ernstige dagblad soos die Frankfurter Allgemeine berig Woensdag dat Zuma kol. Muammar Gaddafi politieke asiel in Kaapstad aangebied het.
Op grond van “hardnekkige gerugte in Suid-Afrika” berig die blad dat Zuma ook “regsbystand” aangebied het “vir ingeval daar ’n aanklag voor die Internasionale Strafhof in Den Haag kom”. En indien hy in Suid-Afrika is wanneer die klag ingedien word, sal die Suid-Afrikaanse regering hom ook regsbystand verleen.
Die koerant skryf verder: “Uit ANC-kringe word verneem dat hulle Gaddafi ‘iets skuld’. Immers het die Libiese leier aansienlik tot die finansiering van die ANC gedurende die stryd teen die Suid-Afrikaanse apartheidsregime bygedra.”
Verskeie koerante het berig dat Zuma die lugaanvalle op Libië skerp gekritiseer het.
Le Figaro (Parys) het selfs berig dat Zuma die skuld van die mislukking van sy sending op Navo gepak het. Die feit dat hy toestemming van Navo moes kry om na Tripoli te vlieg, sou glo die gesag van die Afrika-Unie (AU) ondermyn het.
Sulke beriggewing is sleg vir Zuma en Suid-Afrika se beeld, aangesien daar wye konsensus in Frankryk en die meeste Europese lande bestaan oor die afkeurenswaardige aard van die Gaddafi-regime.
In Londen het die konserwatiewe Daily Telegraph in ’n hoofartikel openlik geskryf Zuma is die verkeerde persoon om te bemiddel.
“Die probleem is dat hy ’n bevooroordeelde bemiddelaar is, en die tydsberekening van sy besoek val saam met Navo-uitsprake oor ’n finale afrekening. Die bande tussen kol. Gaddafi en mnr. Zuma gaan terug na die 1980’s, toe die Libiese leier geld en wapens gelewer het aan die ANC in sy stryd teen apartheid.
“Nelson Mandela het die guns vergoed deur te pleit vir die opheffing van sanksies teen Libië wat ná die Lockerbie-bomaanslag ingestel is.”
Die koerant sê vir die rebelle kan Zuma geen eerlike bemiddelaar wees nie, en die rebelle wantrou die AU weens die aanwesigheid van Afrika-huursoldate in Gaddafi se leër. “Die president moes sy les geleer het toe sy vroeëre bemiddelingspoging in April van die hand gewys is.”
- Volksblad