Lewenslank vir tuiniers wat bejaarde vermoor
2013-01-12 07:29
Pretoria – Twee tuiniers wat hulle werkgewer, 'n bejaarde vrou, drie jaar gelede in Pretoria vasgebind en verwurg het, is Vrydag in die hooggeregshof in Pretoria tot lewenslange tronkstraf gevonnis.
Die lyk van Ida Allen, 60, is dae ná haar bure haar die laaste keer gesien het, onder 'n sleepwa in die erf van haar huis in Pretoria-Noord gevind.
Sy was vasgebind, en 'n hondekossak is oor haar kop getrek en om haar nek vasgebind met 'n tou.
Allen was 'n geskeide pensioenaris wat geen kinders gehad het nie en alleen gewoon het. Sy het vir oudpres. PW Botha as sekretaresse gewerk toe hy nog minister van verdediging was.
Regter Mmonoa Teffo het Kelushi Petrus Hlatswayo, 27, van Groblersdal, en Vincent Tlou Nkgweng, 28, van Tembisa, tot lewenslange tronkstraf gevonnis, tesame met 'n vonnis van 20 jaar, vir moord, roof met verswarende omstandigdhede en die onwettige besit van 'n vuurwapen en ammunisie.
“Die beskuldigdes is jonk genoeg om die kinders van die oorledene te wees. Hulle is mense waarheen sy moes gaan vir hulp, maar pleks daarvan het hulle die vertroue misbruik wat sy in hulle geplaas het," het hy gesê.
– Volg Nuus24 op Twitter.
- SAPA
