Lewenslank vir hamermoordenaar
2011-10-31 14:26
Johannesburg – 'n Man wat 'n teller in 'n poskantoor in Johannesburg met 'n hamer by haar werkplek doodgeslaan het, is Maandag tot lewenslange tronkstraf gevonnis, berig Beeld.
Mark Makhubela is Vrydag skuldig bevind aan die moord op Magda Frazer in Januarie vanjaar.
Beeld het destyds berig veiligheidsbeamptes van die Highlands-Noord-poskantoor in die Balfour Park-winkelsentrum in die noordooste van Johannesburg het op kringtelevisie ’n man gesien wat die agterdeur van die poskantoor oopsluit.
“Hulle het die man as ’n poskantoorwerker geïdentifiseer en hulle nie verder daaraan gesteur nie.”
Frazer se man het haar dié dag om 06:30 by die werk afgelaai en Maganedisa het gesê sy is by die voordeur in. Die rowers het vermoedelik niemand so vroeg daar verwag nie.
Mike Sears van die gemeenskapsbeveiligingsorganisasie CAP het gesê ’n klant wat later by die poskantoor opgedaag het en nie kon inkom nie, het die winkelsentrum se veiligheidsbeamptes laat weet iets skort.
“Lede van CAP en die polisie het gaan ondersoek instel en op mev. Frazer se lyk afgekom.”
Kringtelevisiekameras in die poskantoor het die moord verfilm, het Sears gesê. Dit wys hoe Frazer herhaaldelik met ’n hamer geslaan word.
Een van die twee mans wat by die voorval betrokke was, is as ’n deeltydse werknemer van die poskantoor geïdentifiseer.
Die beeldmateriaal wys die mans het die poskantoor kort ná Frazer binnegekom.
– Lees hier meer.
– Volg Nuus24 op Twitter
- Beeld