Lekota wil ‘twee Cope-gebiede’ hê
2010-12-12 06:44
Die Cope-leierskapstryd raak venynig kort voor die nasionale kongres
Woensdag in Pretoria begin, en die moontlikheid van sy eerste slagoffer
van politieke geweld staar die party in die gesig.
Mbhazima
Shilowa, adjunkleier van Cope, het gister uitgevaar teen Mosioua
Lekota en sy ondersteuners, wat Vrydag ’n amptelike én billike skeuring
voorgestel het.
Volgens die voorstel het Smuts Ngonyama en Lyndall Shope (Lekota-ondersteuners) gesê hulle is bereid om die lyn
netjies te trek met Limpopo, Mpumalanga, KwaZulu-Natal en die
Noord-Kaap vir Lekota, en Gauteng, die Vrystaat, die Oos-Kaap, Wes-Kaap
en Noordwes vir Shilowa.
Shilowa het gesê die voorstel is uiters
vreemd omdat hy en sy ondersteuners gedink het Lekota-hulle berei steeds
voor vir ’n leierstryd tydens die nasionale kongres.
“Terwyl ons
altyd vermoed het hulle is bang vir ’n demokratiese proses, het hulle
ons hul woord gegee hulle sal by die kongres wees,” het hy gesê.
Te
midde van heen-en-weer aantygings is ’n vrou en haar man Vrydagaand in
die township Alexandra geskiet, na bewering omdat sy nie ledelyste wou
verander nie.
’n Vriend na aan die gesin het gister aan Rapport
gesê die vrou, net bekend as Conny, is nou tuis, maar dat haar man nog
in die hoësorgeenheid in ’n Johannesburgse hospitaal is.
Phillip Dexter, nasionale woordvoerder van Cope, het gesê hy is bewus van die saak en dat politieke motiewe vermoed word.
Sipho Ngwema, Shilowa se woordvoerder, het gesê hulle sal die polisie
vertrou in hul ondersoek na die beweerde politieke geweld.
Dexter het gewys op die kwessie van verskille en waardes wat húl lede onversoenbare verskille noem.
“Ons lede wil mense hê wat verantwoordelik is met geld en hy (Shilowa) is nie,” het Dexter aan Rapport gesê.
Shilowa
het die afgelope week skorsing vrygespring toe sy tugverhoor tot
Februarie volgende jaar uitgestel is. Die klag teen hom is juis oor
wanbestuur van die party se geld.
“Lekota-hulle weet hulle gaan
nie sukses behaal met hul MDC-plan nie. Die voorgestelde opdeling van
die land is net nog ’n oefening om die wiele te laat afkom voor die
kongres,” het Ngwema gesê met verwysing na die Zimbabwiese Beweging vir
Demokratiese Verandering (MDC), wat volgens grenslyne geskei het.
- Rapport