Lekota se interdik hou Shilowa uit parlement
2011-02-14 08:36
Johannesburg - Mosiuoa Lekota het ’n interdik in die Johannesburgse hooggeregshof teen sy politieke vyand Mbhazima Shilowa bekom om dié te verhinder om vir ’n maand die parlement te betree.
Intussen is by die Onafhanklike Verkiesingskommissie (OVK) vasgestel dat Lekota regtens die leier van Cope is.
Phillip Dexter, Lekota se woordvoerder, het bevestig die interdik is Vrydagaand toegestaan.
Lekota het ook, volgens Dexter, ’n brief van die parlement ontvang wat hom, eerder as Shilowa, as die leier van dié party beskou.
Dit kom nadat Lekota vroeër die week die parlement ingelig het hy het Shilowa as lid van dié party geskors. Dit sou beteken Shilowa is ook nie meer ’n parlementslid nie en dit sou hom verhinder het om die opening van die parlement by te woon.
Omdat Shilowa egter teen sy skorsing appelleer, het Max Sisulu, speaker, gesê die parlement sal nie optree totdat “die nodige klarigheid” (oor die leierstryd tussen Lekota en Shilowa) gekry word nie.
Shilowa en Lekota het toe Donderdagaand langs mekaar gesit toe pres. Jacob Zuma sy staatsrede gelewer het. Hulle het egter oogkontak vermy en mekaar glo nie eens gegroet nie.
Dexter het gesê die onduidelikheid oor Cope se leierskap sal binnekort eindig. “Lekota is regtens die leier van Cope (op papier),” het Dexter volgehou.
Kate Bapela, OVK-woordvoerder, het bevestig Lekota is “by die OVK as leier van die party geregistreer”.
Adv. Pansy Tlakula, verkiesingshoof, het Saterdag op ’n byeenkoms van die Suid-Afrikaanse Nasionale Redakteursforum (Sanef) in Kaapstad gesê die OVK sal met dié partyleier en -beamptes saamwerk wat by hom geregistreer is.
Tlakula meen die twee strydende faksies kan probleme veroorsaak in die komende munisipale verkiesing, wat na verwagting in middel Mei sal plaasvind.
Shilowa gaan sy skorsing en dié interdik sterk teenstaan, het sy woordvoerder, Sipho Ngwema, gesê.
“Die interdik sê net hy mag nie die parlement bywoon nie, dit sê nie hy is nie meer ’n parlementslid nie.”
Shilowa maak steeds daarop aanspraak hy is op Cope se mislukte leiersverkiesing in Desember tot wettige leier van dié party verkies. Shilowa meen Lekota “het geen mag om my te skors nie, omdat Lekota nie die partyleier is nie”.
Hoewel Lekota én Shilowa op leierskap aanspraak maak, wil albei ’n skeuring in Cope verhinder, omdat ’n wegbreekparty parlementêre setels en geld sal verloor.
- Volksblad