Lekota moet uit kantoor, sê Cope
2010-06-01 09:05
Kaapstad - Mosiuoa Lekota, Cope-president, moet teen Woensdag sy kantoor ontruim nadat hy uit alle leierskapstrukture in die party verwyder is, luidens ’n verklaring deur Sipho Ngwema.
Boonop het Cope se leierskorps aan sy regspan opdrag gegee om die hofinterdik wat Lekota dié naweek bekom het om die leierskongres te stop, te beveg.
Lekota en sy regterhand, Philip Dexter, is Maandag amptelik in kennis gestel oor ’n mosie van wantroue wat op die kongres teen hulle ingestel is.
Albei is uit hul onderskeie posisies as president en kommunikasiehoof verwyder. Hul lidmaatskap van die sentrale nasionale komitee (CNC) is ook beëindig.
“Die hoofsekretaris sal ’n vergadering van die CNC waar die moontlik toekomstige ontplooiing van die twee lede bespreek sal word, byeenroep. Daar word van die voormalige leier verwag om sy kantoor binne 48 uur te ontruim,” lui Ngwema se verklaring.
Lekota het vroeër gesê Cope se interne struwelinge is nie veel anders as twee rugbyspanne wat mekaar die stryd aansê nie.
Vir diegene wat van buite kyk, lyk dit chaoties, maar die spel werk volgens ’n stelsel.
“Ons het gehoop dat dinge anders sou wees, maar dit het op die ou end nie so uitgewerk nie. Ek is egter optimisties dat die hele ding positief gaan uitwerk.”
Die party is verdeel tussen ondersteuners van Lekota en Mbhazima Shilowa, sy adjunk.
Die mosie het gekom nadat Lekota dié naweek ’n hofinterdik om die leiersverkiesing te keer, bekom het. Shilowa was vasbeslote dat die verkiesing van ’n nuwe nasionale leierskorps moes voortgaan. Dié leierskorps – met Shilowa aan die stuur – is toe gekies.
Lekota het Maandagaand aan eNews gesê die betrokke komitee se besluite het geen status nie en hy gaan nie sy kantoor binne 48 uur ontruim nie.
- Die Burger
- Die Burger