Lekota kry warm ontvangs in NV
2010-08-19 10:00
Volksblad
Kaapstad - Mosiuoa Lekota het Woensdag ’n onverwagse warm ontvangs in die Nasionale Vergadering (NV) gekry toe hy vir die eerste keer sedert 2008 daar ingeloop het.
Dít het gevolg nadat die Kaapse hooggeregshof beslis het Lekota se leierskap van Cope, wat deur sy onderleier, Mbhazima Shilowa, betwis is, is geldig.
ANC-LP’s het hom hartlik (sommiges baie sarkasties) toegejuig toe die speaker, Max Sisulu, met die begin van ’n gesamentlike parlementsitting aangekondig het Lekota is vroeër as LP beëdig. Pres. Jacob Zuma het hande geklap, terwyl dr. Mathole Motshekga, ANC-hoofsweep, hom staande toegejuig het.
Shilowa, Cope se hoofsweep, was nie in die huis om sy sitplek langs Lekota in te neem nie. Geen van Shilowa se getroue bondgenote, soos Mluleki George, was daar nie.
Hoewel Woensdag se hofbeslissing ’n einde bring aan die voortslepende regsoptrede tussen Lekota en Shilowa, sal dit waarskynlik nie die einde wees van die bitter stryd tussen dié twee leiers, wat die party tot op die rand van ’n skeuring gebring en in warboel gelaat het nie.
Albei was Woensdag versoenend en het gesê hulle sal ten goede van die party en sy ondersteuners werk.
Volgens inligting gaan die Le-kota-groep egter so gou moontlik met ’n suiweringsproses begin sodra ’n forensiese oudit na Cope se parlementêre geldsake afgehandel is. Shilowa en sy meelopers oorweeg op hul beurt om van Cope af te stig, wat kan beteken die party sal uit twee faksies bestaan.
Lekota het oomblikke ná sy beëdiging in Sisulu se kantoor gesê hy is verlig die soveelste hofgeding is verby sodat hy op sy werk as Cope-leier kan fokus. “Die belangrikste taak is om die party weer op sy spoor te kry. Ons moet ons werk begin doen en die deurmekaarspul wat heers, oplos.”
Shilowa is welkom om onder hom te dien. “Hy het steeds ’n toekoms in die party. Vir hom, en ander, gaan hul plek in die party afhang van hul houding en benadering tot die hofbeslissing en besluite wat deur die partyleierskorps geneem is.”
- Volksblad