Lekota eersdaags parlementslid
2010-07-05 08:22
Die Burger
Kaapstad – Die sekretaris van die parlement behoort vandag ’n brief van Cope te ontvang waarin Mosiuoa Lekota in die plek van Mvume Dandala as LP voorgehou word.
Die party se sentrale nasionale komitee het Vrydag, sonder die deelname van Mbhazima Shilowa en sy ondersteuners, besluit om Lekota parlement toe te stuur nadat die bedanking van Dandala aanvaar en bekragtig is.
Cope is ook in die proses om die wetgewende gesag van Dandala se bedanking in kennis te stel.
Hoewel die Shilowa-faksie volhou Dandala het nié bedank nie, maar bloot ’n aanduiding gegee dat hy van voorneme is om só te maak, het Die Burger ’n afskrif van die bedankingsbrief wat deur Dandala onderteken is. Hy het ook vroeër aan Lizel Steenkamp bevestig hy gaan sy pos as die party se parlementêre leier ontruim.
Dandala se bedanking is Dinsdag van krag.
Dit behoort ’n einde te bring aan die Shilowa-ondersteuners se pogings om die parlement as die laaste vesting van dié groepering te beskerm nadat hy reeds beheer oor die nasionale komitee én die voorbereidingskomitee verloor het.
Shilowa is onlangs sy tekenregte op die party se parlementêre bankrekenings ontneem en daar was ’n groot poging om te keer dat Lekota Dandala se parlementêre setel opneem.
Lekota is eerste op Cope se kandidatelys waaruit plaasvervanger-LP’s aangewys word. Shilowa se pogings om die lys aan te pas, is in die wiele gery toe die hooggeregshof in Johannesburg vroeër beslis het Lekota, en nie Shilowa nie, is die party se regmatige leier.
Lekota sal na verwagting spoedig op ’n spesiale koukusvergadering tot parlementêre leier verkies word.
Dit sal hom in staat stel om ’n volledige oudit van Cope se geldsake en Shilowa – Cope-hoofsweep – se bestuur daarvan te laat doen. Talle bewerings oor wanbestuur, intimidasie en onregmatige besteding is die afgelope weke vanuit Cope se koukus teenoor die media gemaak en hoewel die meeste daarvan ongetoets bly, is daar ’n uitgebreide papierspoor wat Shilowa in ’n slegte lig kan stel.
Dit is tans onduidelik wat Shilowa beplan. Hy was verlede week in Limpopo om steun vir sy hernieude aanslag op die partyleierskap in September te werf, maar hy en sy meelopers weier steeds om aan amptelike partystrukture deel te neem.
Dít verskerp die verdeling wat tans in die party bestaan.
- Volg Nuus24 op Twitter.