Lekota bring hulde aan Tatane
2011-04-23 23:02
Johannesburg - Die Congress of the People-president, Mosiuoa Lekota, het hulde gebring aan die Ficksburg-betoger Andries Tatane by sy begrafnisdiens Saterdag.
Lekota het ‘n toespraak gemaak by die begrafnisdiens in die Meqheleng-township. Hy het roubeklaers herinner dat, in die Sesotho-kultuur, ‘n jong man se mense altyd op hom vertrou om hulle te beskerm, het Phillip Dexter, Cope-woordvoerder, gesê.
“Ngwana monna ke kabeloa manong – ‘n jong man wat oorlog toe gegaan het, het altyd die risiko geloop dat aasvoëls aan sy liggaam sal pik,” het Lekota gesê.
Dexter het in ‘n verklaring gesê Lekota het hierdie vergelyking gebruik om te dui op die “opportunisme van die heersende party, wie se beleid sy dood beteken het en hom dan een van hul eie wil noem nadat hulle hom en sy durf versaak het”.
Lekota het herhaal dat Tatane doodgemaak is deur die land se veiligheidsliggame, wat veronderstel was om hom te beskerm.
“Hy het dié wat gesê het hulle sal in beheer wees totdat Jesus terugkeer, gewaarsku dat hulle hul eie leuens op hul eie risiko glo. Die mense – soos kameraad Tatane – sou in opstand kom teen die status quo.”
Lekota het gesê toe Tatane vir water en ander basiese dienste gevra het, het die owerhede hom met dodelike mag stilgemaak.
Hy het afgesluit deur te sê dat verandering onafwendbaar is en dat, solank mense se lewenstoestande onveranderd bly, die logiese aanduiding is dat die geveg om dit te verander sal voortduur.
Tatane is dood nadat hy na bewering twee weke gelede deur die polisie geskiet is.
Die SABC het beeldmateriaal uitgesaai waarop gesien kan word hoe ‘n groep polisiebeamptes die ongewapende Tatane met knuppelhoue peper. Op die beeldmateriaal hou hy sy bors vas en kyk af na bloed op sy borskas.
Twintig minute later het hy inmekaargesak en gesterf. Hy is vermoedelik deur ‘n rubberkoeël getref.
Agt polisiebeamptes het in die hof verskyn in verband met Tatane se dood. Die saak is tot 26 April uitgestel.
- Volg Nuus24 op Twitter
- SAPA