Lekkerlooproete bied gou weer pret en plesier
2010-08-11 09:51
Theuns van der Westhuizen
Die Burger
Kaapstad - Die Lekkerlooproete in die middestad gaan nog voor die einde van die maand weer gebruik word.
Dié roete, wat tot skaars ’n maand gelede soveel pret en plesier aan derduisende mense verskaf het, gaan op 27 Augustus weer benut word om sokkerkykers van die Kaapse stasie na die Kaapstad-stadion te bring.
Samesprekings is ook Dinsdaggevoer om die pendelbusse en parkeer-en-ry-geriewe wat vir Wêreldbeker-wedstryde gebruik is terselfdertyd in te span.
Twee PSL-sokkerwedstryde word op 27 Augustus in die Kaapstad-stadion gespeel – tussen Vasco da Gama en Orlando Pirates (om 18:00) en tussen Ajax Cape Town en Bloemfontein Celtic (om 20:45).
Sowat 40 000 kaartjies, wat wissel tussen R40 en R80, word deur Computicket vir dié wedstryde verkoop.
Volgens Morné du Plessis, voorsitter van Sail Stadefrance, die stadionoperateur, word die kaartjies bekostigbaar gehou om soveel as moontlik aanhangers ’n kans te gee om die atmosfeer van die Wêreldbekertoernooi te herleef.
“Ons hoop ook dat baie mense wat nog nie hier was nie die kans sal gebruik om die stadion te besoek.
“Die stadsraad gaan nuwe lewe in die Lekkerlooproete blaas en ons nooi mense om op pad na die stadion aan die pret en plesier deel te neem.”
Mario das Neves, voorsitter van Vasco de Gama, het bygevoeg dat sy span baie opgewonde is om hul eerste PSL-wedstryd ooit in dié stadion te speel.
“Ons klub is vanjaar 30 jaar oud en daar kan nie ’n beter plek wees om dit saam met die Kaapse sokkerkykers te vier nie.”
Sail Stadefrance en verteenwoordigers van die stadsraad het gister ook samesprekings gevoer oor die gebruik van die pendelbusdiens na die stadion.
’n Finale besluit sal na verwagting vandag geneem word.
’n Program van vermaak voor die wedstryde sal later bekend gemaak word.
Intussen het die Wes-Kaapse minister van sport en ontspanning, Sakkie Jenner, ’n beroep op Kapenaars gedoen om plaaslike sokker te ondersteun.
“Die twee wedstryd is ’n gulde geleentheid om weer gees in ons plaaslike wedstryde te blaas.
“Die Kaapstad-stadion, wat R4,4 miljard gekos het, sal oorbodig raak as ons nie sulke geleenthede ondersteun nie.
“Ons moet probeer om die gees van patriotisme wat tydens die Wêreldbeker-toernooi geheers het, voort te sit. Kom ons blaas ons vuvuzelas vir plaaslike sokker.”
Volg Nuus24 op Twitter
- Die Burger