Leigh Matthews se lyding spook steeds
2012-01-26 09:38
Johannesburg – Leigh Matthews se ouers sê hulle kan steeds nie slaap nie as hulle dink aan wat sy deurgemaak het nie.
“Dit is wat my wakker hou in die aande – om te dink aan die lyding wat sy moes deurmaak,” het Rob Matthews Woensdag gesê.
“Hoe durf hy vir ons vertel hy het ons dogter in daardie tyd vertroos?”
Sharon Matthews het haar man ’n bemoedigende druk op die arm gegee en aan joernaliste gesê: “Sy moes so bang gewees het.”
Sy meen Moodley is die klassieke voorbeeld van ’n sosiopaat.
Die Matthewse vind dit baie moeilik om weer ná soveel jaar in dieselfde hof as hul dogter se moordenaar te wees en na sy “bisarre” aantygings te luister.
Mnr. Matthews het gesê hy glo nie Moodley se nuwe weergawe nie. “Maar hy is baie oortuigend, en dit maak my bang.”
Me. Matthews meen daar is gedeeltes van die nuwe weergawe wat moontlik waar kan wees, maar glo nie dwelmhandelaars het hom afgedreig nie.
Volgens die Matthews-egpaar sal hulle dié hoofstuk in hul lewe eers kan afsluit sodra al die mense betrokke by hul dogter se moord vasgetrek is.
Moodley se pa, Stephen Moodley, het die hofverrigtinge ook Woensdag bygewoon.
Volg Nuus24 op Twitter
- Beeld