Matthews-moordenaar wil 'waarheid' vertel
2012-01-25 10:15
Johannesburg – Die veroordeelde moordenaar Donovan Moodley sal Woensdag na verwagting in die Johannesburgse hooggeregshof aansoek doen om 'n herverhoor, het ‘n koerant berig.
The Star berig dat Moodley na die hof wil terugkeer om “die waarheid” te vertel.
Volgens die dagblad sal Moodley ook aansoek doen om sy skuldigbevinding en vonnis tersyde te stel.
Moodley is daaraan skuldig bevind dat hy die student Leigh Matthews (21) in Julie 2004 ontvoer en vermoor het.
Hy het haar vir menigte ure aangehou voordat hy R50 000 se losprys van haar pa geneem het. Daarna het Moodley vir Matthews geskiet.
Hy is op 4 Augustus 2005 gevonnis. Hy is lewenslange tronkstraf opgelê vir moord en tot 15 jaar tronkstraf gevonnis vir ontvoering. Regter Joop Labuschagne het hom ook tot 10 jaar vir afpersing gevonnis.
Moodley beweer in die aansoek dat drie dwelmhandelaars – Frank, Allie en Jemba – hom gedwing het om Matthews te ontvoer.
Hulle het eers probeer om ‘n Franse student, Gasper, by die Bond-universiteit in Sandton, Johannesburg, te ontvoer. Hul plan het egter nie uitgewerk nie.
Moodley sê hy het nie die dwelmhandelaars geken nie, maar hy wou hulle help om Gasper te ontvoer aangesien hy hulle geld geskuld het.
Hy sê hy was baie bang vir die dwelmhandelaars. Hulle het Moodley opgespoor en gesê hulle kon nie Gasper in die hande kry nie. Die dwelmhandelaars was glo desperaat vir geld.
Daarna is Matthews ontvoer.
Volg Nuus24 op Twitter
- SAPA