Leerlinge in hospitaal nadat chloorbom ontplof

2009-10-27 07:19

Bloemfontein - Twee leerlinge aan die Hoërskool Bloemfontein is beseer toe ’n tuisgemaakte chloorbom in ’n plastiekbottel by die skool naby hulle ontplof het.

Die polisie ondersoek die voorval Vrydag by die skool toe ’n matriekleerling die chloorbom na bewering in die rigting van ’n groep leerlinge gegooi en dit ontplof het.

Brandon Third (16), ’n gr. 9- leerling, is na die ongevalle-afdeling van die Bloemfontein Medi-Clinic gehaas nadat chemikalieë in sy oë beland het.

Sy ma, Elize Third, sê dit was Vrydag die matriekleerlinge se laaste dag by die skool.

“Al die ander leerlinge het ’n erewag vir die matrikulante gevorm sodat hulle by die skool kon uitstap. Waterballonne is heen en weer gegooi en dit was alles in ’n goeie gees.”

Third sê dinge het lelik skeefgeloop toe ’n matrikulant na bewering ’n chloorbom in die rigting van leerlinge gegooi het.

“My kind het die bottel uit nuuskierigheid opgetel. Dit het onmiddellik ontplof.

“Twee onderwysers het ten minste kop gehou en sy oë met water uitgespoel.”

’n Tweede leerling in gr. 10, wie se ouers verkies dat hy anoniem bly, het langs Brandon gestaan toe die chloorbom ontplof het en chloor het op hom gespat.

Die leerling het sy pa gebel en dié het hom toestemming gegee om huis toe te gaan.

“My seun het op sy motorfiets geklim om huis toe te gaan. Op pad daarheen het sy oë erg begin traan en hy het nie lekker gevoel nie. Hy het om die eerste draai van sy motorfiets geval.”

Die pa sê daar word vermoed dat die chloor in die beperkte spasie van die valhelm sy seun aangetas en die ongeluk veroorsaak het.

Die seun het sy linkerpols gebreek en skraapwonde opgedoen. Skade van nagenoeg R6 000 is aan sy motorfiets aangerig.

’n Ooggetuie van die ongeluk wat dié leerling gehelp het, het bevestig dat hy na chloor geruik het.

Die ouers is woedend oor die voorval en die skool se klaarblyklike ontkenning van skuld.

“Die skoolhoof het eenvoudig R500 in my hand gedruk en gesê ek moet my kind dokter toe vat. Later het hy gesê dit was onverantwoordelik van ons kinders om die chloorbom op te tel,” het Third gesê.

Tobie Connoway, skoolhoof, het gister geweier om kommentaar te lewer.

Amanda Appelgryn, woordvoerder van die Medi-Clinic, het bevestig Brandon is vir chemiese brandwonde behandel en na ’n oogspesialis verwys. Sy het ook bevestig die tweede leerling se pols is gebreek.

Supt. Annelie Wrensch, polisiewoordvoerder, het gesê ’n klag van aanranding met die opset om ernstig te beseer word ondersoek.

Die Vrystaatse onderwysdepartement is van die voorval in kennis gestel.

- Beeld