Leerling vas ná messtekery
2011-11-08 21:07
Johannesburg – ‘n Vyftienjarige seun is Dinsdag in hegtenis geneem nadat hy na bewering sy klasmaat in Lefiswane naby Hammanskraal gesteek het, het die polisie gesê.
Twee seuns het Maandag omstreeks 14:00 ‘n argument buite Seruane Sekondêre Skool gehad, het sers. Hastings Chaane gesê.
Een het na sy huis gehardloop en met ‘n mes teruggekeer, het hy gesê.
“Hy het sy 14-jarige klasmaat toe een maal in die rug gesteek en weggehardloop.”
Die oorsaak van die argument was nie onmiddellik duidelik nie. Die polisie het leidrade opgevolg en die seun omstreeks 11:00 by sy huis vasgetrek, het Chaane gesê.
Hy sal na verwagting Woensdag in die hof verskyn op aanklag van aanranding.
Die beseerde seun is by ‘n plaaslike kliniek behandel.
- Volg Nuus24 op Twitter
- SAPA