Leerders steek nog klaskamers aan die brand
2010-04-15 10:32
Malmesbury – In ’n tweede dag van geweldpleging is nog drie losstaande klaskamers van die Sekondêre Skool Naphakade in Malmesbury Woensdag deur oproerige leerders aan die brand gesteek.
Die Wes-Kaapse minister van onderwys, Donald Grant, het intussen ’n dringende interdik aangevra dat slegs amptenare van die Wes-Kaapse onderwysdepartement op die perseel toegelaat word.
Die skool sal tot Maandag gesluit wees, het hy gesê.
Die oproer het Dinsdag begin en die polisie moes leerders met rubberkoeëls uitmekaar dryf nadat ’n klaskamer, twee toilette en die hut van die skool se sekerheidswag aan die brand gesteek is.
Woensdag het leerders ruite van die skool se klaskamers stukkend gegooi. Leerders het ook in en om die skool en voor die landdroshof getoi-toi waar vier medeleerders wat eergister in hegtenis geneem is, verskyn het.
Hulle eis ’n nuwe skoolgebou. Die Sekondêre en Primêre Skool Naphakade deel tans ’n perseel en leerders kla dat daar tot 60leerders in een klas is.
Volgens Sharon Mbala (15), ’n leerder van die skool, is die hele aksie vooruit beplan.
“Totdat hulle presies vir ons sê wanneer die nuwe skool gebou gaan word, sal ons hiermee voortgaan.”
Nadat Vuyella Swelindawo, ’n onderwyseres, gister onsuksesvol probeer het om leerders te kalmeer, het een van die leerders ’n droë tak in ’n klaskamer gesit en dit saam met papiere aan die brand gesteek.
’n Groep swaar gewapende polisiebeamptes wat toe die skoolterrein binnegegaan het, is deur leerders met klippe bestook.
Twee leerders, onderskeidelik 18 en 20 jaar oud, is op aanklagte van brandstigting en openbare geweld in hegtenis geneem. Hulle sal vandag in die Malmesbury-landdroshof verskyn.
Volgens konst. Henry du Randt, woordvoerder van die Malmesbury-polisiekantoor, was die situasie by die skool gistermiddag onder beheer.
* Volgens Du Randt moes ses buitelandse eienaars van spaza-winkels Dinsdagaand hul winkels in die dorp sluit. Vandale het deur die loop van die nag by die winkels ingebreek en dit geplunder.
– Die Burger