Leerders se ouers finansieel onder druk
2011-01-11 06:49
Kaapstad - Finansieel uitdagende maande is aan die begin van 2011 ouers van skoolgaande kinders se voorland.
Só het Gert du Plessis van die Kaapse Verbruikersraad Maandag gewaarsku.
Die nuwe Wes-Kaapse skooljaar wat volgende week begin bring hope uitgawes vir ouers.
Skoolgelde moet betaal word en daar is ook die onkoste van nuwe skooluniforms.
Die algemene gevoel is dat verbruikers slimmer koop om finansiële druk in die nuwe jaar te verminder.
“Mense oorbestee in Desember,” het Du Plessis gesê.
Die raad het baie navrae van verbruikers ontvang om op sy begrotingsgerief hul aankope te doen.
Dié gerief stel die verbruiker in staat om betalings oor ’n langer periode te maak en só finansiële druk te verminder.
Du Plessis voel die verbruiker sukkel nog hierdie jaar.
Hy het bevestig die nuwe kredietwet verhoed steeds dat mense nie meer bestee as wat hul middele toelaat nie.
Volgens hom sal ouers eerder gehalte inboet wanneer hulle skooluniforms aankoop.
“Die gehalteverskil tussen produkte van verskillende produsente is nie só groot dat die verbruiker ’n duurder produk sal koop nie.”
Du Plessis het ook aangevoer dat verbruikers in die algemeen aankope afskaal.
“Ek is bevrees kleinhandelaars gaan vanjaar swaarkry omdat die verbruiker goedkoper produkte sal koop.”
Paddy Attwell, woordvoerder van die Wes-Kaapse onderwysdepartement, het gesê skole mag strafmaatreëls teen ouers toepas indien leerders nie die verlangde skooldrag dra nie.
“Leerders mag egter nie om dié rede verhoed word om klasse by te woon nie.”
- Die Burger