Leerders gewoond aan skietery, lyke

2012-11-01 09:34

Kaapstad – Leerders van Hanover Park in Kaapstad leef voortdurend met die vrees dat hulle hul lewens in bendegeweld kan verloor, het 'n Kaapse koerant Donderdag berig.

Skote word daagliks naby skole gehoor, en baie leerders moes al vir hulle lewens hardloop, of het al gesien hoe iemand geskiet word, het die Cape Argus berig.

"My bekommernis is dat die kinders al so gewoond is daaraan. Hulle kan jou vertel hoe [bendelede] die vuurwapens oorhaal. Dis baie kommerwekkend dat hulle na bendelede kyk as hulle rolmodelle," het Dawn Petersen, hoof van die Blomvlei-laerskool, gesê.

"Hulle dink abnormaal is normaal."

'n Groep van Petersen se leerders het onlangs gesien hoe 'n swaar voorwerp na 'n ander leerder se pa gegooi word. Hy het later weens 'n kopbesering gesterf.

In 'n ander voorval het 'n vrou een oggend naby die skool in kruisvuur gesterf. Haar lyk is eers later die middag verwyder.

– Volg Nuus24 op Twitter.

- SAPA