Leërbasis kan nie al sy karre opspoor
2010-09-29 07:41
Johannesburg - Die situasie by die weermag se Leërsteunbasis Johannesburg is nie “gesond” nie, maar daar word hard gewerk om dit reg te stel.
Dít is hoe lt.genl. Solly Shoke, hoof van die leër, die afgelope week op navrae oor bewerings van ongerymdhede en gebreke op dié basis gereageer het.
Groot fout met veral die verrekening van toerusting het aan die lig gekom.
So is nagenoeg 30 voertuie wat afgeskryf of na ander eenhede geneem is nog in die eenheid se inventaris. Ná maande kan die voertuie steeds nie “opgespoor” word nie.
Van die afgeskryfde voertuie is op ’n weermagveiling aan burgerlikes verkoop. In die voertuigregister is die weermag egter steeds die eienaar, wat die vrees laat ontstaan dat die nuwe eienaars van die besit van ’n gesteelde voertuig beskuldig kan word.
Die weermag se inspekteur-generaal én die ouditeur-generaal het tydens inspeksies verskeie tekortkominge in die basis se verrekeningsproses uitgewys, maar min het glo nog verander. Volgens Shoke gaan dié proses voort in ’n poging om die basis se boekhouding in orde te kry.
Volgens hom is ’n voorraadopname onlangs met die hulp van spesialiste in die eenheid gedoen en tans word hard probeer om syfers en voorraad te laat klop.
In Desember verlede jaar is 13 motorfietse op die basis gesteel sonder ’n teken van inbraak. Die saak word sedertdien ondersoek, maar niemand is aangekeer nie.
Volgens Shoke is die basis se ligging by Lenz in die suide van Johannesburg sodanig dat dit ’n maklike teiken vir misdadigers is.
Planne word beraam om ’n betonheining om die basis op te rig om diefstal te probeer beperk.
Daar is ook probleme met geld.
So is daar in die huidige finansiële jaar meer as R100 000 bestee om die eenheid se konferensiegeriewe op te knap en rekenaartoerusting te koop.
Desondanks het die bestuur besluit om sy jaarlikse spanbou aan die KwaZulu-Natal suidkus te gaan hou teen ’n koste van nagenoeg R70 000.
Die basisbestuur het ook R20 000 opgedok net om die ingang na die eenheid en ’n tuintjie by die hek deur ’n landskapskepper te laat verfraai.
Dié uitgawe is aangegaan terwyl die geboue op die eenheid uitmekaarval.
Shoke het erken dat die geboue in ’n skokkende toestand is en dat die kwessie reeds herhaaldelik met die departement van openbare werke opgeneem is.
- Beeld