'Lastersaak was nooit oor die geld' - McBride
2010-03-01 23:18
Bloemfontein – Sy lastersaak teen The Citizen was nooit oor die geld nie, het Robert McBride, die voormalige hoof van die Ekurhuleni metropolisie, Maandag gesê.
“Die geld was nie belangrik nie, dit was oor die beginsel,” het hy Maandag in reaksie op die appèlhof se beslissing oor die saak, wat meeste in sy guns was, gesê.
Die hof het beslis dat die The Citizen verkeerd was om McBride ‘n moordenaar en krimineel te noem in ‘n reeks redaksionele opmerkings en ‘n rubriek deur ‘n vryskut-joernalis wat in September en Oktober 2003 gepubliseer is.
Die artikels is geskryf toe dit bekend geword het dat McBride die hoof van die metropolisie gaan word.
Die koerant het berig dat hy nie geskik is vir die posisie nie, omdat hy ‘n krimineel is, ‘n moordenaar wat glo betrokke was in onwettige aktiwiteite met wapenhandelaars in Mosambiek.
Die hooggeregshof in Johannesburg het McBride se argument, dat die artikels lasterlik was, bevestig en beslis dat die koerant R200 000 in skadevergoeding aan hom moet betaal.
McBride het Maandag gesê dat die appèlhof se besluit bevestig het dat dit “onwettig” is vir die koerant om op so ‘n wyse oor hom te skryf.
Hy het bygevoeg dat die appèlhof se beslissing ‘n groter implikasie het as die lasterkwessie. Dit sal bydra tot versoening in Suid-Afrika.
Die appèlhof het gesê dat McBride nie meer as ‘n krimineel en moordenaar gebrandmerk kan word in verband met die bomaanval by die Magoo’s Bar/Why Not Restaurant in Durban in 1986, waarin drie vroue dood is nie.
Sapa