Landdros besluit finaal oor media in Griekwastad
2012-08-23 13:41
Griekwastad – Alle mediahuise word toegelaat tydens die hofverrigtinge van die opspraakwekkende Steenkamp-gesinsmoord, het OFM berig.
Die landdros het finaal besluit alle media mag in die hof toegelaat word.
Die seun wat in verband met die moorde in hegtenis geneem is, se naam mag nie gepubliseer word nie, omdat hy ‘n minderjarige is.
Sapa het vroeër berig vriende en familielede van die Steenkamp-gesin, wat op Goeie Vrydag op hul plaas vermoor is, het by die hof opgedaag. Die media was ook teenwoordig.
‘n Landdros van Groblershoop, ‘n naburige dorp, sal na verwagting die saak aanhoor nadat die plaaslike landdros hom aan die saak onttrek het.
Volksblad berig Christo Els het homself verskoon omdat hy die gesin goed geken het.
Sommige media-groepe het aansoeke ingedien om tydens die hofverrigtinge teenwoordig te wees. OFM berig alle media-groepe word toegelaat.
‘n Minderjarige seun is vroeër vandeesweek by ‘n Bloemfonteinse skool in hegtenis geneem in verband met die moord op Deon, Christelle en Marthella Steenkamp.
‘n Betroubare bron het vroeër aan die radiostasie gesê die kind is Dinsdagoggend in die skoolhoof se kantoor vasgetrek.
Die enigste oorlewende van die gesin, Don, het gesê hy was buite in die pakskuur toe hy die skote gehoor het.
Don het op die lyke afgekom en na die polisiestasie gery om die moorde aan te meld. Hy het ook twee vuurwapens aan die polisie oorhandig.
Die seun het gesê hy het die vuurwapens op die toneel gekry.
Volg Nuus24 op Twitter
