Landbou-stakings: Afvaardiging besoek gebiede

2012-11-23 11:15

Johannesburg – Gerrit van Rensburg, minister van landbou in die Wes-Kaap, lei tans 'n afvaardiging na van die gebiede wat die ergste onder die geweld van die onlangse plaaswerker-stakings deurgeloop het.

Betogings oor lone het verlede week in De Doorns begin en na 15 ander nabygeleë dorpies versprei. 

RSG berig boere het miljoene rand se verlies gely toe eiendom in onder meer Ceres in die Witzenberg-gebied aan die brand gesteek is.

Senior amptenare van die departement van arbeid vergader ook binnekort met boere op Worcester om die sektorale vasstelling van minimumlone en indiensnemingsvoorwaardes van plaaswerkers te bespreek, het die radiostasie berig.

Die departement sê die samesprekings is daarop gemik om insette van werkers en werkgewers te verkry oor die vlak waarop die minimum loon vasgestel kan word.

Plaaswerkers het vroeër gewaarsku dat die stakings voortgesit sal word as daar nie voldoen word aan hul eis van R150 per dag nie.

Volgens berigte is R80 die hoogste aanbod wat boere sedertdien gemaak het.

Volg Nuus24 op Twitter