Land verloor 'n literêre reus
2011-12-27 07:26
Stellenbosch – ’n Puntenerige man, maar ook ’n mens wat eintlik onsterflik is – só is JC Kannemeyer geprys nadat die nuus van sy dood bekend geword het.
Prof. Russel Botman, rektor van die Universiteit Stellenbosch (US), het gesê hy onthou hoeveel vreugde Kannemeyer geput het daaruit dat sy alma mater met die toekenning van ’n eredoktorsgraad twee jaar gelede uiteindelik erkenning aan hom gegee het.
“Maar wat my nóg beter bybly, is die passie waarmee hy toe gepraat het oor die volgende boek en wat hy wou doen. My gevoel is dié is ’n mens wat eintlik onsterflik is, selfs in sy weggaan wil hy agterbly – op vele rakke, in talle huise en in baie mense se gedagtes.”
Ton Vosloo, Naspers se nie-uitvoerende voorsitter, het gesê Kannemeyer was die hardwerkendste van Suid-Afrika se ernstige skrywers.
“Ons uitgewers het hom oor dekades leer ken as ’n kwasterige outeur – puntenerig – maar ’n mens wat ’n produk van hoë gehalte gelewer het. Hy was die doyen van Afrikaanse biografieë. Sy werk- en uithouvermoë om iets wat hy aangepak het, klaar te kry, was indrukwekkend.
“John Kannemeyer was enig in sy soort. Ons bring hulde aan ’n groot Afrikaanse letterkunde-kenner en ’n waardevolle bydraer tot ons kultuur in sy volste sin.”
– Volg Nuus24 op Twitter.
- Die Burger