Land Bank: Boere kry hulp
2009-08-11 14:09
Liezl Vercueil
Kaapstad - Die meer as 500 boere wat hul plase kan verloor weens onbetaalde lenings aan die Land Bank se toekoms lyk ‘n tikkie rosiger, berig Landbou.com.
Tina Joemat-Pettersson, die minister van landbou, bosbou en visserye, sê die regering sal ‘n R146 miljoen-reddingspakket beskikbaar maak om dié boere te help om hul grond te behou.
Die geld is nie ‘n moratorium op betalings nie, maar is ‘n manier om sukkelende boere te help om die mas op te kom, sê sy. Skuld sal ook nie onverskillig afgeskryf word nie en elke boer se saak sal beoordeel word waarna besluite op meriete geneem sal word.
Ben Marais die voorsitter van die TLU SA, sê die sowat 200 kommersiële boere wat hul grond kan verloor weens onbetaalde lenings aan die Land Bank is broodnodig om Suid-Afrika se voedselsekuriteit te verseker.
Hy vra ook of die regering se reddingsplan vir verskeie ander sektore ook na die landbou gebied gaan word. Dié R8 miljard-plan se doel is om die uitwerking van die wêreldwye ekonomiese krisis in Suid-Afrika teen te werk.
Joemat-Pettersson het die National African Farmers’ Union (Nafu) in Pretoria toegespreek en het gesê die regering nie die grondrestitusieproses wil sien agteruitgaan nie. Met dié doel voor oë is die benadering van “gebruik dit of verloor dit” ook aangepas.
Grond sal nie van enige boer geneem word nie totdat daar bewys is dat die Regering die nodige steun rakende bedryfsaktiwiteite, vaardighede en markgeleenthede verskaf het.
Volgens Otto Mbangula, die voorsitter van Nafu, is daar tans net 40 swart kommersiële boere in Suid-Afrika terwyl sowat 21 000 swart boere bemagtig moet word om ook dié vlak te bereik.