Laaitie val 5 vloere, voel 'sharp'
2009-10-19 10:05
Retha Grobbelaar
’n Sewejarige seuntjie van Johannesburg het eergister wonderbaarlik oorleef toe hy deur ’n venster vyf verdiepings ver geval het tot op ’n betondak.
“Ek het ’n wonderwerk-seun. Ek kan nie glo hy lewe nie. Hy kon dood gewees het. Ek dank God,” het Zoleka Dzai (34), Sonwabise Mbonyana se ma, gister gesê terwyl haar seuntjie aan ’n hamburger en slaptjips in die Garden City-kliniek geëet het.
“I am sharp,” is al wat hy gister uit sy hospitaalbed gesê het.
Volgens Werner Vermaak, ER24-woordvoerder, het die seuntjie verskeie frakture aan sy bene en bekkenbeen opgedoen.
Sonwabise het eergistermiddag teen sy ouer boetie, Ntsikomzi Mbonyana (10), en maatjies resies gehardloop in die gang van hul woonstelblok in Joubertpark in die Johannesburgse middestad.
“Dit was tussen 13:00 en 14:00 toe ek hom gevra het of hy middagete wil hê,” het sy ma vertel. “Hy het gesê hy speel nog. Ná sowat ’n uur het sy ouer boetie ingekom en gesê hy het deur die venster geval, maar dat hy nog lewe.
Daar is ’n lang venster in die gang en Sonwabise het in die hardloop deur die venster gebars en geval.
“Ek het van die bed af opgespring,” het sy ma gesê. “Sonwabise was onder in ’n poel van bloed. Ons was almal só geskok. Ek het my foon vir iemand gegee en hulle het die ambulans gebel,” het Dzai gesê.
Sonwabise het vyf verdiepings ver tot op ’n dak geval. Daar was skerp yster-diefwering op die dak wat hom aan sy regterbeen en linkervoet gesny het.
’n Onbekende man het hom van die dak afgehaal en hom na die ontvangs van die woonstelblok geneem.
Dzai het by die trappe afgehardloop na die ontvangs.
“Ek het gedink hy was dood. Nooddienswerkers het hom bedek met ’n blinkerige plastiek. Ek het gedink ek het my seun verloor,” het Dzai gesê.
“Hy het al gesê hy wil ’n vlieënier word. Ek glo God het hom ’n tweede kans gegee. Hy is ’n wonderlike, taai seuntjie,” het sy gesê.
- Beeld